愛華頓今夏增兵異常進取，甚至有啲曼城嘅影子。「拖肥糖」先以2,700萬英鎊簽入阿積士隊長卡拉臣，又由新特蘭羅致英格蘭小國腳門將比克福特，令佢成為史上第三貴門神(約3,000萬鎊)，簽入般尼中堅米高堅尼亦好事近。朗奴高文仲未手軟，目標包括馬拉加前鋒辛度拉美利斯、史雲斯中場基菲爾施古臣同AC米蘭前鋒麥巴耶尼安等。拖肥糖搞咩突然咁財大氣粗呢？因為有大水喉射住囉！伊朗富商摩舒利以2億鎊收購咗愛華頓49.9％股份成最大股東，的起心肝大執球會，首先炒咗成績欠佳嘅領隊馬天尼斯，換上朗奴高文，然後再請李斯特城奪冠幕後功臣華殊擔任足球總監一職，希望藉連番改革可衝擊來季英超前六。
