李察利臣
加比爾捷西斯
利記主帥高普喺爭四冠王嘅關鍵時期，突揮筆續約，擺明想將隊波嘅士氣推向頂峰，令「埃及球王」穆罕默德沙拿加薪留隊機會大增，紅軍下屆坐擁5大前線尖兵任輪換陣式不變。不過其餘列強加埋新興力量嘅紐卡素，都想喺今夏大手筆買前鋒，其中曼城下屆有火熱嘅高大歐洲射手艾寧夏蘭特加盟嘅話，將一改多年無鋒陣打法，令人期待；但夏蘭特始終未踢過英超，挪威國家隊又唔叻，個人近一兩年傷患多，呢項投資風險唔細。
如果列強想睇辦，英超市場內有曼城後備兵嘅「耶穌」加比爾捷西斯、車仔冷板王盧卡古、冇晒信心嘅「紅魔」福仔同埋「耶穌」嘅巴西鄉里李察利臣。最要留意係李察利臣，愛華頓若然護級失敗，佢走嘅成數極高；呢位衝刺型箭頭，最唔好成日詐傷，射術亦有待進步，但可塑性甚高，可翼可鋒；反而近期發奮嘅「耶穌」轉會費更貴外，喺「藍月」近年有源源不絕嘅供應，入球率亦唔算高，有啲似十多前嘅一樣踢過「藍月」嘅森巴鋒將羅賓奴，進步有限。