跑全馬42.195公里，看似漫長艱辛，但有過萬人跟你一起喺鬧市中封路作長課，嗰種感覺對一位平凡不過嘅跑手嚟講，先係最正。唔少跑友認為渣馬「三隧三橋」難跑又悶，但畢竟係香港每年跑界嘅盛事，不能要求跟地球上最快賽道「柏林馬」相比。這裡造PB當然不易，但「跑馬」最重懂享受攞苦嚟辛嘅過程，盡力完賽，呢個先係最大嘅樂趣。幸好今次渣馬賽前天公「造美」，臨開跑前一晚轉吹清勁東風，雖然間有微雨，但喺公路上一齊食吓逆風、側風，跑得好爽；沿途補給又足，工作人員又多又快手。只怪渣馬或者真係太受歡迎，組別太多，半馬、全馬跑手後半段在路上聚合混戰，有能力嘅要穿插攞位，自然難不到你。跑全馬變數多，賽後隨便可找個失敗嘅藉口安慰自己，最強「市民跑手」川內優輝曾因成績不好用剃頭明志。小弟今屆成績不令自己滿意，點滴在心頭，從不用跟他人比較，只求往後裝備更好，保持健康，仍能享受在「三隧三橋」上奔馳。
