炒咗阿迪達
繼藍月之後，哥帥高徒阿迪達帶領嘅阿仙奴，正經歷季內最黑暗嘅日子，盃仔連敗，射極唔入，最慘情係主力逐一倒下。冬窗轉會過了半個月，球會班兵毫無動靜，阿迪達最新被炒賠率跌咗一半；如果以成績表衡量，2019年教到依家，只喺疫情時攞過英足盃，呢兩屆又踢得返歐聯，以呢張成績表，離開唔係奇事。
問題係即時補一個歐洲聯賽頂級高大中鋒，就可以成為贏波「答案」，再度染指重要錦標？如果係，達sir唔會猶豫叫有關高層開水喉、哥帥買防中唔係啱啱買咗中堅，曼聯呢11年多唔洗換10個領隊。達sir上任以來嘅手段，係用兄弟情、家庭愛去維繫成個團隊士氣，一班小兵漸成大器，個個有家室有BB，球會上下眼中只有希望。一首London is Red攞返倫敦一哥之位，嗰種齊上齊落嘅凝聚力唔只齋講成績，係近年頂級球會中少見。冠軍只得一個，每年向隅者多，識得同球迷自high嘅波士唔多。兵工廠明晚返英超鬥死敵熱刺係下半季成敗一大關鍵；只要London唔變White，阿迪達應該「長命」過哥迪奧拿。