費蘭度托利斯上季雖然唔係馬體會主力，但都交出8個入球、5次助攻，最後一輪西甲對畢爾包時更梅開二度。今夏就約滿，一度傳出佢會轉戰墨西哥聯賽，仲話有球會以20萬英鎊周薪作出利誘，對於33歲、已踏入職業生涯尾聲嘅費托嚟講，都咪話唔吸引呀！不過，馬體會有買人禁令處罰在身，佢哋宣布王子會留多一個球季，但係條款都好彈性嘅，下年1月買人禁令結束後，雙方可選擇提早解約。
顏值高嘅王子，魅力又點會局限喺球場上呢？最近佢就同荷蘭潮流品牌聯乘合作並擔任模特兒，仲喺廣告硬照中大騷胸肌同腹肌，足球男神吸金同吸粉絲能力都一樣咁掂，就算踢到收山都不愁出路啦！
