等老孫發「虎」威
季尾英超，悶戰越嚟越多，傳統英超Big Six上輪只有排名最低嘅熱刺，主場贏修咸頓，其餘全部失分。熱刺喺歐霸入到8強，可唔可以神奇奪歐霸入返歐聯，幫隊長孫興民標尾會之餘，南韓球員又可以喺頂級聯賽爭口氣？季尾歐聯定歐霸，關注度遠勝英超放甩後散散地嘅利物浦。
孫興民今季戰力加快走下坡，聯賽暫只入7球，或破效力熱刺10季以來新低；其實南韓球員喺歐洲頂級聯賽，數量同影響力亦下跌，5大聯賽只剩唔夠10人，日本球員多一倍。「太極虎」新星李康仁養傷中兼早已失落PSG正選，撐得住只剩踢緊歐聯嘅拜仁中堅金玟哉，季尾同老孫幫南韓「叫兩飛」。熱刺今季大跌，外界多歸咎防線大半季殘缺不存，其實老孫把握力差咗亦係主因之一，不過江湖地位夠，而且場場踢到盡，冇乜人會狠評；但佢畢竟今年夏天都33歲，對住英超敵衛嘅速度已吃力，合約就續到下年，但今屆熱刺若失再守，只怕老孫回歸韓職前，更難圓捧盃夢。歐霸對手比英超行運速度慢，季尾過3關，期待「老」虎拼盡發威。