疫情底下，英超賽程大亂不止，今個月有錢買人，之後無病無傷等齊腳踢補賽，當然唔怕係咁改；但連續6屆生存英超嘅蚊型班般尼，只踢咗17場聯賽，嚟緊賽期塞爆，先喺英足盃自爆出局，而17/18年球季佢哋正正喺第3圈即死，當屆就攞咗球會史上最佳嘅英超第7名。但般尼疫情下更莫財，人腳年年熟口熟面，英超最長壽領隊戴治今屆難得搵到新射手哥尼特打箭頭，但呢位科特迪瓦人打緊非國盃；又要靠返基斯活特喺前線又衝又撞，呢班波計踢法真係唔值得再留低。今屆諾域治同屈福特「九降」，般尼同現時全球最富有嘅球會紐卡素應係下半季你死我亡格局；據聞有唔少英超球會唔鍾意財大氣粗嘅紐卡素，但最好笑係近日傳出紐卡素斟緊基斯活特過檔，呢招絕喎。
雷聲大雨點小嘅紐記，先簽過氣英格蘭右閘捷比亞做第1擊，嚟緊3星期嘅冬窗，恐怕騎呢事續來；不過對手只係一隻「蚊」嘅般尼，相信唔使要撬到奧士文尼迪比利、奧巴美揚或者安東尼馬迪爾等射手，都保到命啩。