曼聯宣布與30歲阿根廷門將羅美路，續約至2021年。羅美路上季喺英超只有兩次上陣機會，因為始終迪基亞先至係頭號門將，但羅美路喺歐霸盃就一直擔任正選，而且表現出色，成為捧盃功臣。自2009年首次入選阿根廷國家隊，羅美路喺2010年打後都係首席門神，佢喺今屆世界盃外圍賽14場都係正選，穩健嘅演出令人信服。
作為國家隊冧巴溫鋼門，羅美路喺球會竟然甘願屈居後備，事實上，佢一向作風低調，明白自己嘅位置之餘，亦默默耕耘做好本份，機會嚟到時，又懂得把握。其實羅美路嘅實力早已獲得肯定，坐唔到球會嘅正選位置，只係時辰未到啫，事關皇馬始終都係吼住迪基亞……
