英超聖誕、新年嘅傳統快車期迫近，13、14日內踢4場，比賽密度喺英超唔算苛刻，但對Big Six嚟講，要全勝並不容易。踢到俾加利仔話似肉醬意粉咁亂嘅曼聯最危，上屆快車期頭3場全和，佢哋依家內在人事問題緊張，嚟緊4戰全對中下游球隊，都唔易踢。阿仙奴領隊艾馬利同車仔波士沙利初登英超，應該開始見識到英倫冬天濕冷嘅難捱。兩人都鍾意排三後衛陣式，啱啱阿仙奴輸俾弱過藥煲嘅修咸頓，擺明排錯陣，喺場濕地滑下，頂唔住對手高空轟炸，守將又唔停咁傷；車仔嚟緊嘅對手實力唔弱，仲打三後衛叫大衛雷斯「頂」檔，亦有啲牙煙。
熱刺兵薄到剛戰用18歲嘅史基比第一次打中場，樸治天奴喺列強中輪換最冒險，小心玩出火。至於曼城同利物浦，今屆應係單打獨鬥，不過曼城上屆年尾都試過同水晶宮交白卷，隊中嘅南美兵呢段時期嘅水準唔算穩定；最強勢嘅利物浦，年尾先主場鬥阿仙奴，跟住下年初作客曼城，如果咁都贏得晒，首個英超錦標仲唔走近？