近年歐洲足球壇轉會費及人工不斷升值，略有名氣嘅年輕球員，叫價都起碼幾千萬歐元以上，人工就仲誇張，好似朗尼咁，即使長居後備都有30萬英鎊周薪。除咗球員之外，領隊人工亦非常豐厚，近日有英國傳媒報道，曼聯領隊摩連奴係全球最高收入教練，據悉佢一年總共賺得約2,420萬鎊，其中1,300萬鎊係曼聯嘅人工，其餘就係廣告收入，相信唔少球迷都睇過佢嘅電視廣告。第二位係中國國家隊教練納比，總收入約2,030萬鎊，第三位係前巴黎聖日耳門主帥白蘭斯，收入約1,730萬鎊，曼城領隊哥迪奧拿只排第五位，收入約1,250萬鎊，僅高於摩帥一半。以上咁多位教頭絕對係打工天王，佢地搵一年嘅錢，大部分人搵一世都搵唔到，所以帶軍成績唔理想的話，俾球迷鬧亦冇得好怨。
