邪宅

前排有位海歸女性朋友要嚟香港工作，佢係單身寡女，剛入投行打工，希望搵個四、五百呎單位，最緊要係方便企理，灣仔就最啱佢呢類投行初哥喇，事關銀碼唔太大而又近住中環。

Loser對住呢啲單身靚女自然大獻殷勤，頻頻問佢使唔使幫手，海歸女話睇咗灣仔某個樓盤，幢樓交通好便利，樓齡只係七、八年，附近夾雜啲老香港建築，新舊交替，前少少嘅日、月、星街一帶又有好多歐式小店，啱晒呢啲偽文青兼懶有品味嘅囡囡。

一問係邊個盤，海歸女答咗乜乜軒，Loser面色大變，即時洒手擰頭。點解呢？原來呢幢樓有名邪，大廈屬市建局跟私人發展商重建物業，喺0七年落成，算係幾新淨，但呢幾年竟然接二連三發生啲恐怖離奇事件。

二０一二年頭，有個租客喺三十幾層跳落嚟，撻到斷開兩截，肢離破碎，死者原來喺東區醫院做高級專科醫生，只係三十零歲，事業如日中天，唔知點解要尋死？後尾經過一輪調查，先知佢患咗愛滋病，一時睇唔開要自殺。

過咗冇耐，大廈個複式單位有位澳洲籍租客，晨咁早上去會所泳池游水，游咗一陣後坐喺張沙灘椅休息，突然心臟病發，送院後證實死亡。

咁都未算衰，舊年底時有個英籍投行租客報案要求警方協助，差佬去到時赫然見到有個南亞裔女子血肉模糊死喺地上，再四圍搜查，喺露台搵到個篋，打開一睇，竟然有件女屍，身體已發脹發臭仲有屍蟲。原來位變態殺手先後跟兩個妓女歡好，因服用毒品失常性而將佢哋殺死，事件震驚一時。

一幢起好只有七年幾嘅樓，咁短時間有四個人死於非命，仲要一宗比一宗恐怖，你話點住得落，若然海歸女搬咗入去，即使靚女邀請，Loser都唔敢上佢屋企，就算送佢返歸都周身唔聚財喇！

即使買嚟投資，雖則樓價較平，但買入容易賣出難，今年四月幢樓某個單位以七百幾萬成交，買家後來知道樓上樓下發生咁多不祥嘢，寧可撻訂都唔買。呢個決定冇錯，即使你話好多屋苑都發生過死人或意外，但呢個盤係單幢樓，短短幾年發生咁多事故，實在罕有，如果樓市有乜調整，幢樓價格跌得會好快，仲好難搵買家，總之咁邪住宅，一句講晒，避之則吉。