薯片爆金句拍住上撐回帶廿年棟篤笑

「薯片叔叔」曾俊華喺選戰之後，唔使俾錢請人取消fb專頁之餘，仲繼續經營佢喺幾年前已開設嘅個人fb專頁，依家佢仲久不久喺度露面，分享下生活逸事，噚日佢突然出返嚟玩拍住上短片，先嚟一句：「睇一個人棟篤笑，不如睇兩個人棟篤笑」，咁似佢參選時的宣傳片slogan「相信一個人，不如相信每一個人」嘅！咁樣搞gag，就係為咗撐曾志豪與陳嘉銘嘅「回帶廿年棟篤笑」表演囉！

薯片叔叔喺片中爆咗唔少金句，當講到佢係冷面笑匠，請教佢點樣為之一場好嘅棟篤笑時，佢就話其實棟篤笑同劍擊有好多相似的地方，如果擊中對方要害，「啲哈哈笑會多到上個鼻果度」；仲有，講到曾志豪為咗度稿，住咗幾個星期酒店，薯片就話：「但係我哋做人呢，work hard就不如work smart」，仲提議曾志豪睇多啲新聞，會有好多諗都諗唔到嘅笑話。

不過，當中都有爛gag位，就係曾志豪突然問薯片會否剃鬚？薯片話：「剃鬚就唔會啦，睇show呢我就一定會嚟。」仲話佢個有錢都買唔到嘅公關團隊都買唔到飛喎！兩位棟篤笑主角梗係識做，立即免費送飛俾薯片叔叔，仲提埋大家拍住上，喺嚟緊嘅周末(13日)與周日(14日)一齊去新光戲院大劇場睇騷㖭！