英超瘋狂快車走到尾聲，曼城仍遠遠放離，就算大衛施華成個聖誕新年假期「失蹤」，短期內冇埋奇雲迪布尼同加比爾捷西斯，今屆走過半程，都好難輸多過最接近對手4至5場而失落冠軍。「藍月亮」剛戰長勝斷纜兼傷兵突增，但都唔值得喺本月買入阿仙奴嘅阿歷斯山齊士返嚟，齋踢聯賽；佢哋要博埋歐聯，實欠一位冇踢過今屆歐洲賽嘅中後場好手。
利物浦率先豪花7.5億港元買中堅，擺明博歐聯，但勿忘門將問題更嚴重；曼聯難得同紅軍一樣，歐聯16強抽好籤，摩帥出晒口術天天呻窮呻慘，今個月可能係最積極出手嘅英超強隊。熱刺打嚟打去，都係哈利卡尼一個，起球場冇錢擴軍，今屆最有機會一事無成；最怕打殘哈利仔，同爭世界盃嘅英格蘭攬炒更大件事。
車仔明晚作客阿仙奴，合演今年首次列強內訌。傳統6強之中，車仔算踏實但領隊干地對帥位最唔留戀；佢喺今季5鬥列強極少交收，今場鬥傷兵多、休息少兩日嘅主隊，「炒車」隨時會係兵工廠。
