佛系抗疫

有出版界朋友話，佢地好躁，因為點解出版界冇任何政府資助。Well，出版界的龍頭係親中書商同埋出版社，佢地水源充足，使鬼政府資助咩？至於小型出版社，自生自滅，市場經濟嘛！

言歸正轉。上周英帝首相波叔仲講緊，「佛系」抗疫，原因係有一堆專家認為，由於醫療體制頂唔順，不如做「高危老人救治、中青年家居隔離、青年保持距離、幼童自我隔離」呢種「佛系」式處理。點解呢？佢地計過，既然醫療體系都頂唔順，而且社會已經大規模爆發，再用圍堵方式去抗疫，根本無能為力。

問題係，呢啲應該係睇統計數字而兵行險著嘅冷氣軍師。喂阿哥，成個歐洲已經兵荒馬亂，全部淪陷，呢個「佛系」方式，只會嚇到所有歐洲國家以至全球國家對英帝封關，咁英帝係未仲大件事？後來呢，呢個佛系政策，嚇到美帝侵侵立即將禁飛令伸延到英帝，真係摑咗波叔一大巴。

咁樣咪令到波叔咪跪低。幾日後佢轉軚加強防疫。冇辦法啦，佛系防疫，搞到全國大亂，個個都去搶物資，超級市場冇晒貨，因為人民見到，首相將人民嘅性命作賭注，由得人民生病響屋企，仲唔買多啲貨閉關仲得了？咁波叔都識轉彎嘅，根據報道，佢話，政府收到帝國學院嘅另一個數學模型推算，出現驚人發現，就係原來佛系做法，損傷都係好慘重，而且對英國醫療及社會衛生，後果可能更嚴重云云。老實，轉軚轉得快，唔會太核突。既然係咁，齊心抗疫咪算囉。但係，就係呢班冷氣軍師，搞到英帝政府冇晒寶貴嘅時間去用盡全力去抗疫，呢樣真係難以接受。

冷氣軍師周圍都有。侵侵都唔例外。聽講原本呢位阿伯覺得，既然呢個病毒似係流感，其實大家都可以輕輕鬆鬆共同度過，唔使搞咁多嘢，佢仲四圍鬧公共衛生官員點解搞唔掂，仲有「炒晒佢地」之意圖。不過後來呢位阿伯，回心聽返公共衛生專家之言，開始知道大鑊，立時補飛，仲即刻變臉，將自己比作抗疫大將軍，一邊放水救經濟，一邊就火力全開，將美帝疫症蔓延嘅問題，歸咎於北方強國。咁侵侵都幾絕，嗰頭就鬧疫症面前唔好講政治，但呢頭發炮鬧民主黨州份嘅抗疫做得差，聯邦政府好想幫佢哋，另一邊就玩blame game，食住北方強國發言人講過話美軍可能響武漢散播病毒嘅留言，日日就鬧北京，將美國人嘅憤怒，轉晒去第二度。其實，任何人都睇到，美帝由day one有疫症開始，就用了無為而治(仲衰過佛系)，當作冇事，結果隨時成個國家大爆發。侵侵有冇能力將壞事變成競選連任嘅工具，將疫症轉成有利選舉嘅招數呢？睇個勢，如果美帝民主黨真係拜登出來選，咁侵侵都掩住半邊嘴笑矣。