MIRROR六子姜濤、盧瀚霆(Anson Lo)、呂爵安(Edan)、陳卓賢(Ian)、江𤒹生(Anson Kong)及柳應廷(Jer)昨晚在灣仔會展舉行首場《MOOV LIVE Music On The Road》音樂會。六子除了唱出自己作品，也有翻唱五月天的《離開地球表面》、古巨基的《大雄》、林家謙《聽風》等作品，最驚喜是姜濤的第九胎《鏡中鏡》於舞台上誕生，編舞與曲風都令人耳目一新。另外，有鏡粉期待的「Jerdan」、「登神」、「姜Ian」CP組合，還有AK與姜濤合唱《Coming Home》、Ian、Jer合唱《Shallow》等，齊齊交出水準表現，教鏡粉們耳朵懷孕。
完騷後六子接受訪問，姜濤被問到以LIVE形式發布新歌的感受時，他一時說不緊張但一時又說很緊張，在旁的Edan不禁連翻追問：「咁你緊張定唔緊張呀？」，姜濤答：「啊sorry，唱嗰時緊張。」Edan再追問：「跳嘅時候唔緊張？」姜濤低頭想想再說：「跳嗰陣時都緊張⋯」可愛又搞笑，但問到自評表現時，他就認真表示要睇play back，希望明日比今日好，看有甚麼改善之處。
姜濤除了首唱新歌《鏡中鏡》。(蘇文傑攝)
姜濤首唱新歌《鏡中鏡》。(蘇文傑攝)
姜濤談退休 搞到AK俾女仔玩？
至於致敬環節，姜濤繼續認真mode，「其實好耐之前就想做，因為入行第三年，慢慢覺得了解多咗廣東歌嘅歷史，所以其實一直都想做呢一part。」而電影《梅艷芳》亦啟發了他：「身為artist，其實唔單只係作品，身為artist嘅責任其實應該更加大。」問他是否按原定計劃29歲退休？他答道，「而家仲未買到樓，等買完樓再同大家講，有冇呢個能力退休先。」AK嘗試幫姜濤解圍，「通常都好快變嘅，我細個都話唔同女仔玩㗎！」言下之意現在喜歡跟女生玩？他一時語塞，半投降地說，「而家俾女仔玩囉！」成功獲救的姜濤笑到彈開，「多謝你！」
繼3年前的《全民造星》後，Anson Lo再次自彈自唱，本身已考獲6級鋼琴的他花了逾兩星期練習，並有詢問Edan的意見，自評表現比彩排時好。Edan亦大讚：「比我想像中彈得好。」豈料教主聽罷即反問：「你想像我彈得好差？」
AK以一曲《黑之呼吸》打頭陣。(蘇文傑攝)
Ian雖沒有唱自家作品，但演繹古巨基的《大雄》、薛凱琪的《字花》等令樂迷聽出耳油。(蘇文傑攝)
Anson Lo花了逾兩星期練習自彈自唱《不可愛教主》。(蘇文傑攝)
Jer搲頭談女友 眾兄弟笑到失控
Jer被問到女友可有睇騷？他表示已邀請女友到場，但要待完成音樂會再處理感情事，當被問到「情況都樂觀嗎？」Edan即搶白說：「好似醫生咁！」眾子即熱烈討論，「樂唔樂觀呀？」「危殆定係點呀？」可愛的Jer坦白回應，「要完show先知。」當問他可有為特別唱給女友聽的歌時，Jer秒回：「冇㗎！」旁邊的Anson Lo聽到反白眼：「喂呀，唔係話冇囉！」AK高呼：「已經危殆了！」另一邊的Edan則抵死地點出完場前合唱的《Ciao》(意指：再見，亦可解作Hello)，眾子聞言笑到失控，聽到搲晒頭的Jer繼續認真回答，「因為今次rundown跟住音樂會主題去唱。」場面爆笑。
Edan又被問到有關MC張天賦《記憶棉》被落榜事件，他直言略聞有關報道但未有細閱詳情，他表示，「在《造星II》時已識識MC，大家也屬同組，一直很欣賞他，其實獎項屬其次，最重要是愈來愈多好音樂帶給市民，大家繼續留意香港樂壇。」對於叱咤我最喜愛歌曲15強中，MIRROR佔了8首，AK多謝粉絲支持，他呼籲大家集中火力投選MIRROR團歌之餘，亦不忘提醒大家多投自己喜愛的歌曲，令樂壇百花齊放。最後，Ian對再次與兄弟站台表演感開心，期待下次12子齊人開騷，他又表示昨晚女友未有到場，但父母也有來睇騷支持。
相關新聞：
MIRROR六子開騷 姜濤獻唱《夕陽之歌》向樂壇前輩致敬 (有片+多相)
叱咤2021｜全男班打入我最喜愛歌曲15強 MIRROR佔8首
Yahoo十大熱門搜尋潮語「躺平」奪冠
Ian與Jer彈著結他合唱《Shallow》，樂迷耳朵懷孕了。(蘇文傑攝)
Ian與Jer彈著結他合唱《Shallow》，樂迷耳朵懷孕了。(蘇文傑攝)
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
