2021-12-16 19:32:00

MC張天賦下載古巨基歌俾老竇打到飛起

古巨基早前出post，預告他的I.R.L.T.S.聯乘專輯將會與Tyson Yoshi合作，今晚基仔再出post，透露另一個合作單位是MC張天賦。

小學雞時已聽基仔歌

二人首次「見面」，MC即興奮表示：「我真係好鬼開心呀！多謝你邀請。」隨即自爆小學二年級就聽基仔嘅歌，人生第一張買的專輯就是基仔的《星戰》，更記得專輯內第一首歌是《天才與白痴》，「我三、四年級時記得你出咗隻精選，係大碟嚟㗎，由嗰陣時開始我就煲晒你所有歌啦。」

隨後MC又分享兒時買歌的趣事，「好記得小學時我發現咗可以上網買歌，《愛變了這世界襯衣》就係其中一首我上網買嘅歌，最後張月結單過千蚊，俾daddy打到飛起，我記得嗰陣時係廿蚊一隻歌，再計埋上網download，跟住成條數就好襟計啦。」他又稱自己有一個扮基仔唱歌的習慣，特別是演繹《愛與誠》、《傷追人》兩首歌曲的時候。

獲讚唱live穩定

聽完MC對歌曲的熟悉度，基仔開心地說：「因為你啱啱講嘅有好多未必有機會plug，但係你都咁熟，多謝你。」MC直言：「因為我真係成隻專輯DL落嚟，成隻煲晒㗎。」基仔續說：「我真係多謝你，因為可能好多人都係聽主打歌，但你連裡面都嗒埋，我覺得做碟能夠成隻有知音聽到，我係好開心，多謝你。你加油呀，你真係唱得好好。我有睇到你live，你唱live 好穩定，真係好好。」聽到基仔大讚，MC難掩興奮心情。