俗語有云「行行出狀元」、「職業無分貴賤」，但現實中又是否人人都抱持這種看法呢？網上今日流傳一段車Cam影片，顯示一名帶著小孩子的女子，乘坐的士時懷疑的士司機故意兜路，在雙方爭拗期間，女乘客更表示「我唔同你呢啲粗人講」、「我住跑馬地㗎」，又說「自己沒有朋友住屋邨」，隨即引起網民熱議。
影片長約3分鐘，事發於上周六近下午2時，一名的士司機向坐後座的中年女乘客解釋，不經告士打道前往跑馬地的原因，女乘客起初語氣正常，慢慢開始提高聲音，表示「我梗係知啦，我揸車㗎嘛，咁但係我唔係靠揸車搵食呀嘛」，的士司機立刻回應：「喂唔關我事㗎，小姐你唔好發我脾氣」，並解釋自己已很有心機解釋行駛路線，僅對方不明白並突然呼喝，又說如果女乘客喜歡行駛該處，願意載女乘客回去。
的哥：「衰過啲人住屋邨」 女客：「我冇朋友住喎」
之後雙方均提高聲音，女乘客叫的士司機「可唔可以收聲」，的士司機質疑她「唔夠佢講」，女乘客就指「我梗係唔同你呢啲粗人講啦」；的士司機指「我冇話我係斯文人」、「我唔知你有幾斯文囉」。此外，女乘客突然表示「我住跑馬地㗎！阿哥」，的士司機就指「自己檢討下自己行為啦，跑馬地」，其後又說「衰過啲人住屋邨」，女乘客回應「我冇朋友住屋邨㗎喎」，的哥則回應「我都冇朋友住跑馬地」，女乘客立即笑指：「哈，你梗係冇啦」。
網民：2021年金句
影片上載後引起網民熱議，不少網民都批評該女乘客的態度：「住跑馬仔大哂？」、「住跑馬地好X勁咩？」、「2021年金句： 我住跑馬地」、「最憎人狗眼看人低」、「影衰哂住跑馬仔的人」，亦有人大讚的士司機好修養：「司機全程無粗口，好波！」、「遇著呢啲人仲同佢講道理，居然一句粗口都無」。
片段中的女乘客質疑的士司機「兜路」，雙方口角期間，女乘客指對方粗口，表示「我住跑馬地㗎」。(網片截圖)
amJetso送太興鮮臘腸 👇立即按此參加
