賽馬會「耆樂唱一舖」無伴奏合唱銀髮人生精彩下半場

年輕時忙着照顧家庭、為事業打拼，驀然回首，經已踏入黃金歲月，如何繼續活得精彩？有老友記就選擇參加賽馬會「耆樂唱一舖」，以無伴奏合唱(A cappella)的方式，譜奏出屬於他們人生下半場的美秒樂章。

為長者提供多一個享受藝術的渠道
賽馬會「耆樂唱一舖」由本地專業無伴奏合唱劇團「一舖清唱」全力籌備及舉辦，並由香港賽馬會慈善信託基金捐助，為期三年(2019 - 2022)，致力為長者及退休人士提供一個自我增值及貢獻才能的平台與機會。負責籌備是次計劃的一舖清唱藝術總監伍卓賢先生分享當初萌生開辦這個計劃的原因：「以往A cappella多數係年輕人會學、會玩嘅活動，但並唔代表長者唔適合呢種活動。一舖清唱過去都有舉辦長者工作坊，我哋喺長者身上發現好多可能性，同時亦見到佢哋對學習嘅熱誠同投入，令到我哋想將A cappella推廣俾更多長者，等佢哋能夠有多一個享受藝術嘅渠道。」

同齡聚首的快「樂」共同唱出人生「樂」趣
不過要重新認識及學習一個新技能，老友記又會否因困惑而有所卻步呢？賽馬會「耆樂唱一舖」項目總監(藝術)劉兆康(Sam)同時身兼計劃下課程導師一職，擁有豐富教授A cappella經驗的他就認為老友記相當努力：「佢哋一旦選擇咗去做一件事，就會全力以赴去完成。A cappella好講求成員之間嘅合作性同默契，只要有一位成員出錯，唔單止會影響到其他成員嘅音準或節奏，仲會拖垮成個演出。所以佢哋每次上堂都會好認真，問好多問題，亦都唔介意重複不斷去做。」

Sam亦從老友記身上看到一張又一張的幸福笑臉：「我一直覺得『耆樂唱一舖』嘅『樂』係有兩個意思，第一個係同齡聚首嘅快樂，佢哋因為A cappella而變成老友，會約埋一齊上其他興趣班、落堂又會一齊去飲茶，擴闊咗佢哋嘅社交圈子；而第二個係唱出人生嘅樂趣，可能好多長者年輕時曾經都好有表演欲，但為咗生活被迫放棄，晚年有機會重拾興趣，個種喜悅同成就感對佢哋嚟講係好大。」

「疫」境之下繼續唱
為期三年的賽馬會「耆樂唱一舖」共有5大項目，包括學徒導師培訓項目、長者無伴奏合唱訓練課程、藝團駐場計劃、長者無伴奏合唱演出及歌曲及音樂錄像創作。無奈一場世紀疫症，令到多個課堂、茶聚，甚至演出被迫暫停或取消，伍卓賢先生坦言要不斷「變陣」鼓勵長者繼續學習：「我哋嘅導師除咗同長者WhatsApp video call之外，亦拍咗《抗疫時期無伴奏特輯》去幫長者溫習，當可以再次上堂嘅時候，就可以更快追返進度。」他亦希望疫情可以盡快過去，未來賽馬會「耆樂唱一舖」的中期演出及大匯演能夠如期舉行，讓大家欣賞一眾長者學員的成果。