當原力覺醒後，除咗全球狂收逾20億美元票房之外，亦代表《星戰》系列正式強勢回歸，未來將會推出3部新作。最先登場嘅係首部外傳《俠盜一號：星球大戰外傳》(Rogue One：A Star Wars Story)，此片已入圍來屆奧斯卡「最佳視覺特效」20強，亦同系列所有前作一樣充滿話題性，事關前六部曲嘅重要角色都唔會現身，唔少fans都聞到陣陣伏味。
文：Wing
片方今次除咗公布故事主線同《星戰》系列重心人物Darth Vader及死星(Death Star)有關之外，其他部分可以話係無跡可尋，根據官方公布，內容大致講述一群無名革命軍「俠盜一號」，喺《星球大戰前傳：黑帝君臨》同《星球大戰：新的希望》嘅故事時間線之間，聯手盜取死星藍圖，而當時正值銀河系勢力各據一方、衝突處處。
新人事 新作風
《俠》片宣傳咗咁耐，大家都知將由全新班底主演，包括菲莉絲迪鍾斯、班曼德森、科華士韋德加、戴高路拿、姜文及甄子丹等，雖然久別多集嘅Darth Vader將會出場，並繼續由James Earl Jones配音，但冇咗多位重要人物，已剪斷唔少影迷情意結，依家連R2-D2、C-3PO等機械人都換清光，會唔會玩大咗？不過，據上周睇咗28分鐘試片場嘅美國傳媒指，全新嘅security droid K-2SO相當搶鏡，比《原力覺醒》BB-8更搞笑及吸引。有傳K-2SO同C-3PO功能差不多，由Alan Tudyk以Motion capture方式演出；而另一新機械人C2-B5，外形則與R2-D2類同，只係唔同顏色，但佢隸屬於帝國軍，由於導演話過，但凡進入帝國軍者都要被洗腦，亦即是，「忠心」嘅C2-B5將會同丹爺及姜文等革命軍呈敵對狀態。
冇經典片頭字幕＋配樂
作為系列首部外傳，《俠》片有一定程度嘅不同，相信大家都可以接受，但「不同」到連片頭經典字幕都冇埋，就似乎大鑊啲。據《Variety》報道，《俠》片監製Kathleen Kennedy指，該片屬於一個獨立故事，風格不同，更形容較似一部二戰時期動作及冒險電影，有別於前作嘅科幻片風格，亦因為咁，所以製作方會以「一般電影」處理，片頭只會roll片名。而系列御用配樂師John Williams編曲嘅主題音樂都會換埋，而且配樂師更一換再換，由於該片於6月時進行補拍，本來負責配樂嘅《生命樹》金像提名配樂師Alexandre Desplat，本來已為另一部戲開咗工，最後要臨時改由《奇異博士》配樂師Michael Giacchino接手，早已有傳背景音樂將會面目全非，而事實上，睇咗試片嘅美國傳媒都表示，片頭的確冇播出John Williams嘅經典開場音樂。
《俠盜一號：星球大戰外傳》
上映日期：本月15日
喺戲中有K-2SO機械人傍實嘅菲莉絲迪鍾斯，擊敗多位當紅女星如Rooney Mara及Kate Mara等贏得女主角位置。
由地上最強升呢宇宙最強嘅丹爺，上周與多位演員同影迷玩Facebook live，口快快踢爆自己同Darth Vader冇對手戲。
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
