![《人工殺姬》拍情色版番外篇SOULM8TE 開拓殺姬宇宙](https://cdn.am730.com.hk/s3fs-public/styles/article_image/public/2024-06/WhatsApp%20Image%202024-06-21%20at%205.35.20%20PM_0.jpeg?itok=dvWO24K_)
《人工殺姬》拍情色版番外篇SOULM8TE 開拓殺姬宇宙
呢2年荷里活片廠「買大開細」,大片高開低收埋單僅僅熟,股東好大鑊。所以除咗唔怪得佢地係咁玩翻拍開續集,仲有個新玩法叫Expand the Universe,即係由副線角色開拍分支故事片。廿幾年前《古惑仔情義篇之洪興十三妹》咪就係Expand the古惑仔 Universe囉。
![Photo Credit: Universal Pictures](https://cdn.am730.com.hk/s3fs-public/styles/article_image/public/2024-06/48153941-cfc9-11ed-a9f9-ab7a96b96f8f.jpeg?itok=saj_W9xE)
Photo Credit: Universal Pictures
今日睇到美媒報導,開拍《人工殺姬》(M3GAN)嘅公司宣布開拍「殺姬universe」新片SOULM8TE,並形容套戲係「90年代情色驚慄片」,預計喺2026年元旦翌日上畫,而故事會由《恐懼鬥室》溫子仁有份創作。SOULM8TE講一名鰥夫以人工智能機械人填補喪妻後嘅心靈空虛,但係佢嘗試投放真感情,結果令機械人變成攞命嘅伴侶。睇完故事都可以想像到,比起設定為細路女人工友伴嘅M3GAN,SOULM8TE應該會有人工色香味場面,走成人向路線,條橋相當聰明。
![Ad Block](/assets/v2/img/ui/代替網上廣告_300_250px.jpg)
![Photo Credit: Geoffrey Short/Universal Pictures](https://cdn.am730.com.hk/s3fs-public/styles/article_image/public/2024-06/4819cd20-cfc9-11ed-8bdf-a8cb547029b9.jpeg?itok=bNbfQTFq)
Photo Credit: Geoffrey Short/Universal Pictures
《人工殺姬》可謂係近年其中一部票房奇蹟,1200萬美元成本結果全球大收1億8100萬,條數唔大但係賺到笑!開續集就梗架啦,而家《人工殺姬2.0》暫定下年暑假檔上映,擺明寄予厚望。而家片商為「殺姬universe」另開一條「少甜」嘅SOULM8TE,第時話唔定仲有人工智能男伴、父母、寵物,然後佢地用人工智能,研發照顧人工智能機械人心靈需要嘅人工智能伴侶……沒完沒了有排玩。
原文刊登於 電影LOL