衛詩雅到訪柬埔寨，與助養女兒Chankoa首次見面，感動到眼濕濕。
即將於本月中結婚的準人妻的衛詩雅（Michelle）早前跟隨宣明會到訪柬埔寨兩個社區，自言性格感性Michelle多次淚腺失控，感動時刻包括跟助養6年的女兒Chankoa見面，「母女」齊齊做手工超溫馨，快將出嫁的她在當地體驗最有意義的新娘化妝。而《反起跑線聯盟》導演劉偉恒（Benny)攜同太太王沛然同行，並帶同一對12歲與10歲女兒饅頭和包包，經過一星期探訪和體驗，一家人感受甚深。
向來感性的Michelle早已被同事提醒要控制淚腺，惟她仍禁不住被觸動落淚，「去探訪，我知道會有感受，但係冇諗過咁多感受。好似佢哋同我化新娘妝咁，嗰個年青人得到支援有機會去學化妝，而家仲係當地嘅人氣化妝師，真係好感動，呢個係好有意義嘅新娘妝。」
談到最快樂的行程，必然是與與助養6年的女兒Chankoa見面，一對「母女」溫馨做手工，她說：「見到佢已經眼濕濕，但係又唔想嚇親佢，所以要忍住啲眼淚。我仲扮晒阿媽咁，叫佢拎啲功課出嚟睇吓，我即刻有啲唔好意思，因為我用當地嘅高棉語寫咗張卡畀佢，但係佢啲字靚過我好多。」Michelle表示手寫高棉語，是未婚夫的意思：「佢叫我唔好寫英文，用返當地語言容易啲溝通，我即刻開電話睇住個翻譯嚟抄。」
Michelle希望將來能帶同未婚夫再度探訪：「希望15年後，我再返嚟探佢哋（Kuleaen社區），見證佢哋嘅改變。如果將來有小朋友，我都好希望佢哋可以睇到呢啲片段，甚至有機會嚟經歷吓。」她坦言首兩天探訪特困家庭，看到他們的害怕：「佢哋 (特困家庭) 唔敢同你傾偈，連眼神接觸都唔敢，但係喺後面已經發展完嘅社區，我見到自信，就算15、16歲都會走埋嚟同我分享。原本我都會諗，我可以幫到佢哋啲咩呢？到咗第三日，我見到希望。以前我可能好快落判斷，覺得幫唔到手，而家我覺得要花時間睇清楚、了解清楚，係真係可以幫到佢哋，蟋蟀場、菜園同學校呢啲，見到佢哋可以照顧到自己，真係好開心，我見到好多希望，好多謝宣明會邀請我嚟。」說畢，Michelle感動到眼濕濕。
她直言單憑相片、片段甚至她的分享，對大眾來說可能感受不深，但Michelle相信上天給予她這次探訪的機會，必定有意義：「我真係好感謝可以嚟到呢度，我睇到佢哋好勤力，只係佢哋冇資源同方法。我哋身邊有啲人，畀咗方法佢哋、教佢哋點做，但係佢哋就係唔做，但係呢度嘅人好努力。可能只係畀一隻雞佢哋，話畀佢哋聽可以點，佢哋就可以變到而家咁，所以我覺得真係要珍惜，珍惜你哋擁有嘅一切。我唔係話一定要大家捐錢，但係至少遇到困難，唔好話『我好慘』、『我冇辦法』，辦法一定有㗎！」Michelle表示經過這次的體驗，回港後即時再多助養兩名兒童，連同已經助養的三名兒童，Michelle準備榮升「五孩之母」！
Michelle與Benny一家到訪在宣明會剛進駐的Kuleaen社區，探訪特困家庭及修葺中的小學，其後再經6小時車程，到訪已進駐10年的社區Baribour，對比兩個社區內農耕、煮食、教育、基建、水利等多方面的發展。Benny坦言，起初也疑惑探訪活動能否幫助到有需要的人，「我哋嚟派一餐飯，鼓勵吓佢哋，大家跳一日繩，咁之後呢？我哋可以做啲咩幫到佢哋？」直到親身看到孩童、家庭與及整個社區的成長，Benny感動地說：「勿以善小而不為。可能我哋會諗每個月嗰少少錢，每年收吓信同卡，到底我哋幫到啲咩呢？今次我哋真係睇到。改變唔係一朝一夕嘅，當中有好多困難係我哋想像唔到，但係畀啲時間就會做到。」作為父親，Benny對行程中遇見的其中一位爸爸感受甚深：「初初覺得佢冇乜笑容，後來同佢影吓相、傾吓偈，見到佢開始笑。呢個爸爸曾經有啲唔好嘅習慣，因為宣明會嘅『喜樂家庭』課程，令佢改變咗好多，做返個爸爸、做返個男人。可能佢係由20呎嘅爛茅屋，慢慢到有自己嘅屋，男人就係要孭起頭家，佢其實好可愛，我最記得佢，我都要做好啲！」
入App免費拎荷花BB展入場券
