譚嘉儀早前自稱是苦主之一，但被爆有份注入資金去做演唱會。
憑《超級巨聲3》出道的歌手譚嘉儀，2024年10月尾在香港演藝學院舉行一連三場《Be With You 演唱會2024》演唱會 ，尾場她更碌爆人情卡請來兒時偶像鄭秀文做嘉賓。然而，演唱會事隔接近一年多，最近卻爆出拖糧醜聞，譚嘉儀更自稱是苦主之一。不過，被指是主辦方負責人Jelly今日（6日）就發聲明澄清自己非主辦，更表示自己也要追返譚嘉儀錢，直指譚嘉儀自稱苦主是無稽之談。
譚嘉儀開騷拖糧風波爆羅生門。
自稱苦主
早前，擔任和音的Kasey Pong在社交網公開指至今仍未收到應得酬勞，並無助表示：「主辦方 Two Ally Workshop一直唔出糧，我哋團隊用過唔同嘅方法都搵唔到主辦人 Jelly，佢好似人間蒸發咁，公司都搬咗。其實中途我哋有見過佢幫 DJ樂怡同埋 姚子羚小姐繼續工作，但畢竟兩位小姐同呢件事係無關，所以都冇去打擾佢哋。」及後，譚嘉儀回覆傳媒表示自己亦有六位數字演出費完全無收過，是苦主之一，她更稱曾親自聯絡主辦方負責人Jelly，但對方採取「拖字訣」甚至已讀不回。
今日負責人 Jelly發聲明反擊，並指要跟大家澄清事實真相，又指譚嘉儀有份注資演唱會，但無稽自稱苦主，更大爆譚嘉儀根本沒有聯絡過她。
負責人Jelly發聲明反擊。
全文如下：
Hello 大家好我係Jelly！
就近日各傳媒報道有關於《譚嘉儀Be with You 演唱會2024》提及到我失蹤、公司執笠同走數等等嘅事宜，因為已經影響到我身邊嘅人包括姚子羚小姐及DJ樂宜，所以我有必要同大家講返事情嘅真相。
當時因為譚小姐仲係TVB合約，而佢自己好想搞一個完全屬於佢並可以自己主導晒嘅演唱會，所以就需要其他人去幫佢做呢件事，作為朋友嘅我當時就答應幫佢執行，並且係由譚小姐本人注入資金去做。成件事由海報設計/舞台設計/歌曲/服裝/Dancer/Rundown/嘉賓/慶功等等全部都係由佢去話事。但最後佢竟然表示自己只係打工？！還無稽到同傳媒講自己也是「苦主」？
至今已經接近一年嘅時間譚小姐同我的確無聯絡，我唔理解點解譚小姐會話搵我唔到？只係佢冇搵我，不是搵唔到。因為今次本人嘅愚蠢我亦付出左代價，借貸去找一啲款項，其實調返轉我應該要向佢追討返呢啲嘅款項。
最後，我想講，我並不是主辦，我都要追番譚小姐錢。我肯定呢個演唱會就算賺錢亦都與我無關，因為會係歸晒譚小姐所有！
ADVERTISEMENT
【開APP領取】免費換領麥當勞叔叔之家利是封及揮春
