梁潔華下月13日設靈黃日華讚妻堅強抗癌

黃日華太太梁潔華日前離世，昨日他與女兒黃芷晴到世界殯儀館為太太辦理身後事。雙眼紅腫的他表示與女兒已知太太終有一日離去，所以非常坦然面對，並大讚太太為人堅強。梁潔華的喪禮定於下月13日設靈，並在翌日出殯。

黃日華表示太太的喪禮將會採用香港創價佛教及火葬儀式進行。由於梁潔華生前熱愛做大戲，他將會挑選太太生前喜歡的戲服同飾物做陪葬品，而芷晴則主力揀靈堂布置，她透露以清淡簡潔為主。提到梁潔華的遺願，黃日華說︰「始終都係擔心個女，又好擔心佢阿媽，我同佢講放心啦！個女大個啦，我唔會照顧佢，佢會照顧返我。」

他又讚對方一直以來都很堅強︰「佢真係好叻，好堅強唔會放棄，呢幾年嚟幾辛苦都好，大家見到佢都心痛，佢都一關又一關咁過，希望打贏呢場仗，佢呢種精神可以帶動人唔好放棄生命。」他指之前一直停工照顧太太，經濟上沒有問題，又透露太太生前有立遺囑，並叮囑他何時才看。