【炮轟金球獎】影后查理絲 : 無女導演提名好荒謬

金球獎頒獎禮提名名單日前已公布，一直為女性發聲嘅奧斯卡影后查理絲泰朗(Charlize Theron)，喺提名名單公布不久後，就炮轟金球獎，佢話無女導演獲得提名，簡直係荒謬。

憑電影《爆炸性醜聞》(Bombshell)獲金球獎提名劇情組影后嘅查理絲表示 : 「佢哋(女導演)今年有好多好正嘅作品，佢哋好努力工作，點解連一個提名都冇？好奇怪，簡直荒謬。」查理絲又話，其實提名前佢校咗兩個鬧鐘諗住睇直播，不過鬧鐘冇響，所以錯過咗。之後，佢收到好多祝賀訊息，至知道自己獲得提名。