係愛呀！周柏豪徒手接囡囡排泄物︰好似蟹粉小籠包

周柏豪在《多功能老婆》中扮演暖男Oppa榮浩田，加上升呢做老竇，更加冧到不少師奶。今日他出席電台訪問時，大談湊女經，他說開頭比較辛苦，但照顧了十天之後已經習慣，又指囡囡很乖好易湊。他表示換片是拿手項目，坦言曾徒手接囡囡排泄物。他說︰「佢有時爆出嚟都要用手接，但唔覺得核突，暖暖哋似蟹粉小籠包。」更直言不覺有異味，反而有種溫暖的感覺。

問到為B女改名未，柏豪表示暫時只叫她做「囡囡」，會徵詢風水師傅意見。他又指陪太太入產房，見證B女出世時感覺女人好偉大︰「當日在手術室看到太太剖腹咁辛苦，佢仲安慰我唔好嚇親醫生，自己相當心痛忍不住喊，覺得男人更加唔應該投訴，我會做好本分！」提到他購入4千萬豪宅獎勵太太，他表示單位是去年買入，希望太太可以更上一層樓，又謂財政大權全交予太太，由於對方沒有要求，令他更想把所有都送給太太。