梁朝偉拒拍《如懿傳》劉嘉玲爆跟TVB有關

外間一直有傳《如懿傳》內乾隆一角原本屬意梁朝偉演出，可惜出動天價也未能打動對方。今日劉嘉玲出席一個護膚品牌活動時，終於為偉仔推掉拍大陸劇一事解話，想不到他拒拍的原因有點出人意表。

劉嘉玲話梁朝偉只想拍電影，覺得電影製作較好，至於推掉拍劇及真人騷，嘉玲話︰「佢話佢細個喺TVB度拍得太多，佢有恐懼，佢話太辛苦。佢覺得電視劇嘅對白太多，要背好多對白，尤其是古裝，真係攞佢命，就算好多錢都驚冇命使。」問到朝偉有沒有被天價酬勞打動，嘉玲說他從沒有心動。