泰國BL劇男星New Thitipoom(鄭明心)今日現身尖沙咀,跟周秀娜(Chrissie)、Nancy(歸綽嶢)、張天穎(Jaime)及COLLAR成員Day(許軼)一同出席品牌活動。
Day今日在活動上受訪,她表示雖沒有睇開泰劇,但都有留意泰國藝人,亦有睇過泰國電影,當中最深刻是《出貓特攻隊》,尤其對女主角Aokbab(茱蒂蒙瓊查容蘇因)最為鍾情,已看過她多部電影。Day剛從日本返港,今次她與Lolly Talk成員到當地旅行數天,除了在東京盡情Shopping外,更到富士山浸溫泉及富士急玩機動遊戲。
Day透露今次在日本喪食,每天吃三至四餐,問到有沒有艷遇?她答:「我覺得我有艷遇,因為我哋一齊浸溫泉,好多嘢睇好正,對住富士山個景浸溫泉。」Day大讚一班好友個個都身材好, 並有瘋狂拍照,Day又踢爆在民宿要check out時,Ah Yo(郭曉妍)竟反鎖在廁所兩小時,並說:「Ah Yo反鎖喺廁所兩個鐘至出得番嚟,然後我哋喺出面陪佢傾偈,又在窗度遞一啲食物畀佢,好慘。」經房東找師傅開鎖,Ah Yo被困兩小時後才成功逃脫,慶幸有驚無險,之後大家趕車去下一站,好彩沒有影響行程。
Day指新年過後開始為COLLAR演唱會作準備及排練,她已開始做運動及節食,現時差不多有齊流程,問到是否被追飛債?她表示:「都有親戚朋友問可唔可以買到飛,但我哋內部飛都係有限,可以預訂畀朋友嘅飛暫時唔知有幾多,所以都叫佢哋如果買到就自己嘗試買。」暫時未知會否加場,被問到時有甚麼驚喜給粉絲,Day就大賣關子,叫大家期待一下。