RubberBand計劃年底去西沙開騷 揭幕禮遇音響問題6號執生快

RubberBand及新晉樂隊Cozy Syndrome昨日(17日)到西沙為全新演唱會場地「創舞館」主持揭幕活動及表演。

6號於台上表示，樂隊對新演出場地感興奮，更勾起出道時回憶：「我哋出道嗰陣冇咁多場地，所以去新嘅演出場地都會有特別嘅感覺， 依家開晒燈先發覺原來個場館好靚，天花有拱形嘅設計，好希望大家會繼續支持香港嘅樂隊！」

RubberBand 一口氣唱出三首金曲《小涼伴》、《阿波羅》、《未來見》，6號台上笑言「戒Tag歌名」，感恩各區有表演場地做表演：「我地剛去咗非洲探訪，返來好多感想做首歌，好快比大家有得聽，想比大家關注呢啲遙遠地方發生嘅事情，希望大家會留意。」在演出期間，泥鯭表示接收器有問題，一度要暫停修正問題，6號立即執生講經並笑謂自己向來口水多過浪花。

RubberBand事後接受訪問表示現正計劃年底開騷，有意在新場館舉行，他們表示去不同場地開騷，感情新鮮。問到稍後啟德場館落成之後，可會考慮，他們稱場館可容納更多人，他們要好好努力才敢挑戰。他們又稱將會推出1千隻限量黑膠唱片，稍後又會錄製新專輯《K》。