內地湖北靚女老師黃老師（抖音帳戶：音樂老師花開富貴）近日憑甜美又清秀嘅樣子，及教小朋友唱洗腦兒歌《小小花園》，一夜間爆紅，抖音帳戶粉絲由幾百激增至7百萬，兼被封為「挖呀挖老師」。不過人紅是非多，除咗佢嘅真實年齡被挖出之外，網絡更流傳佢嘅P圖前後對比圖、直播賺到錢就辭職、冇教師資格證及「挖土歌」非原創歌曲涉侵權等等。
黃老師一夜間爆紅後，各式各樣嘅傳聞就不停被挖出，有網民就發現佢喺上年4月時疑似喺微博出PO：「38歲了，第一次打扮自己，彷彿回到了18歲，上了年紀再累也值了」，由於佢嘅外貌睇落相當年輕，似足一位妙齡少女，所以唔少網民知道佢嘅真實年齡後都大感驚訝及表示難以接受。除此之外，網絡更流傳佢嘅P圖前後對比圖，而黃老師雖然冇公開真實容貌，不過佢就話對比圖係被有心人惡意P圖，更喺抖音上載短片澄清自己冇整容，亦都冇嚴重P圖。
3場直播已賺兩球
有傳黃老師喺抖音開3場直播，已經賺200萬人民幣 （約225萬港元），即係相當於做10年幼稚園老師嘅人工。黃老師就話自己冇辭職，並強調影片嘅兒歌係每個幼稚園老師都會唱，自己唔係原創，所以唔牽涉侵權。
至於教師資格證問題，學校已經證實黃老師有奧爾夫音樂培訓機構嘅等級證書，同時自2019年起係學校一年一約嘅音樂老師，每一年都會接受考核。另外，有傳黃老師喺未爆紅前，係無憂傳媒策劃旗下嘅KOL，而無憂傳媒就已經回應指黃老師唔係佢哋旗下嘅藝人。
原文刊登於 Yahoo 娛樂圈
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
