2020-08-12 23:16:00

唐韋琪應徵酒吧歌手獲賞識鼓勵朋友參加比賽追夢

唐韋琪（Vikki）早前收到主持人倪詩蓓邀請，到新城知訊台節目《詩情廿四味》當嘉賓。倪詩蓓指80年代不少人時常都會去一些唱流行英文民歌餐廳聽歌，Vikki稱當時仍是學生的她，見到民歌餐廳有招聘請人唱歌，於是決定去應徵，因而展開她的歌手旅途。

她說︰「我中學時代好流行民歌餐廳，記得有年暑假見到民歌餐廳有招聘請人唱歌，好奇心之下我就打咗呢個電話去嘗試，當時仲叫埋媽媽陪我去『見工』，去到發現原來係訓練歌手嘅公司，而同我見面嘅就係一位鋼琴老師，簡單傾咗少少資料之後就同我試音，覺得我都唱得唔錯，但差少少技巧，所以就安排我去上堂學唱歌，最後仲培訓成為佢哋公司嘅職業歌手。」

Vikki一直被稱為兒歌天后，離開TVB後更自己創業，成立唐韋琪才藝訓練中心，多年來從未離開過小朋友，為教育小朋友教育盡心盡力。Vikki︰「我自己一直好鼓勵身邊鍾意唱歌同有夢想嘅人參加歌唱比賽，我自己都參加過好多次歌唱比賽，好似十九區歌唱比賽、新秀歌唱比賽同埋未來偶像爭霸戰。而喺未來偶像爭霸戰中認識到音樂人許願先生，喺佢嘅安排同訓練之下，跟唔同嘅導師學習，亦因為咁，許願先生成功將我由酒廊歌手變成為寶麗金旗下歌手，而第一首歌就係卡通片長腿叔叔主題曲《夢中天使》。」