軒公認為違背了開設這個網站的初衷，決定向兩位投得者收回黑膠碟。
張敬軒（軒公）向來有不少珍貴的收藏品，當中包括古董、精品、及黑膠唱片等等 。早前他就與團隊搞了一個拍賣網，該網只供Fans Club會員參與，而拍賣所得的收益將作Fans Club營運，自給自足。不過，軒公昨日（6日）就在社交網分享，由他親筆簽名的2022年REVISIT演唱會黑膠唱片，兩張編號0201及0000，竟分別投出逾70萬的天價數字，嚇窒不少粉絲，就連軒公都被嚇親，並認為偏離他的初衷，決向投得者收回拍賣品。
軒公昨晚在社交網貼出成功賣出的兩隻天價黑膠唱片，分別賣得$710,750及 $703,500，他發長文分享感受，並表示：「嘩，我真係唔知講咩好」同時他亦多謝大家踴躍參與。軒公續解釋成立這個拍賣網的原因︰「呢個section其實喺舊年下半年就已經準備好，我同團隊嘅同事係好想有一個安全嘅地方，令到絕大部分嘅會員都可以有機會收藏得到大家有興趣嘅、關於我嘅收藏品，例如我自己收收埋埋嘅得意嘢呀、figure呀、古董呀、同一啲有紀念意義嘅物品呀咁，而我又係一個唔捨得揼嘢嘅人，有啲我自己儲埋嘅嘢，如果可以去到比我更珍惜佢嘅人嘅手上，可能會更有意義。」而他認為昨日賣出兩張黑膠唱片所得的價錢，已遠超了本身的物理價值，亦違背了開設這個網站的初衷，所以經過內部商量後，故決定向兩位投得者收回黑膠碟，他表示：「我哋聯絡咗拍得呢兩隻黑膠嘅兩位朋友，亦都解釋咗我哋做呢一個auction section嘅初衷同理念，好多謝呢兩位朋友嘅體貼同埋諒解，呢兩張黑膠唱片會由HCFC 重新收回，連同原本稍後推出嘅25張特別編號黑膠唱片暫時一併封印，等待將來有更合適嘅場合，再話畀大家知可以點樣參與。」
軒公亦表示其實他拍賣的這些物品，是希望Fans Club有資金能自給自足，他寫道：「呢二十幾張嘅黑膠唱片同埋其他嘅一啲珍貴物件，係我喺呢幾年入面儲儲埋埋放喺HCFC度嘅，係畀佢留返嚟一般情況下自給自足，有時進行系統升級呀或者其他行政嘅日常需要嘅，但係只要去到啲大單嘢，例如演唱會賣飛網站流量擴充吖、搞下啲大型活動，嗰啲就由我出手。」最後，他多謝大家的厚愛及熱情，「我收到曬，我呢兩三日回一回氣, 就出山㗎喇，大家都要好好哋呀, 知嘛，記住，大家都要好呀」粉絲們都乖乖表示尊重軒公的決定，以及明白他的心意。
兩隻黑膠唱片分別以$710,750 及 $703,500賣出。
【立即參加】送香港迪士尼樂園一日門票！
