楊偲泳與岑珈其在《搗破法蘭克》 演一對曖昧賊拍檔。
由談善言、林家熙、岑珈其和楊偲泳主演的動作犯罪電影《搗破法蘭克》 (Smashing Frank)， 楊偲泳與岑珈其在戲中飾演一對曖昧賊拍檔，二人出生入死拖手逃命，更有咀戲，導演安排開鏡首日便拍攝咀戲，Renci主動向戲裡戲外皆是怕醜仔的珈其獻吻，更踢爆珈其原先建議「脷疊脷」，但臨陣縮沙，拍攝時尷尷尬尬，被同戲的楊偉倫恥笑「得把口」。
岑珈其自認失敗
對於開鏡首天便要拍攝咀戲，二人默契十足，岑珈其表示，事前與楊思泳商討如何配合演繹，他說：「不過有緊張，好多謝Renci好專業，其實我覺得自己有啲失敗，明明要男仔令對方安心，反而要女仔同我講OK冇問題，佢好專業。」珈其認為配合劇情，輕輕的一吻已經好夠能表達箇中意義，珈其說：「我同Renci 之前兩套戲合作都係情侶，但係冇試過錫，反而今次唔係情侶，曖昧關係有錫，感覺浪漫。」
Renci笑說：「我哋本身圍讀時，本身尺度係大嘅，但基於好多原因就縮到好細。導演本身諗住係激啲，我之前係驚我嘅人身安全，而家我都唔敢面對，見到佢我會驚，因為珈其太太係跆拳道黑帶。」不過，導演蔡康凝為維持緊湊節奏，忍痛剪走兩人咀戲。
唱伊健《甘心替代你》超浪漫
另一場兩人拖手逃亡戲，則非常浪漫，珈其說：「我哋好浪漫，我覺得好似動漫嘅浪漫的鏡頭，共患難共生死。」他更唱起鄭伊健的《甘心替代你》。Renci 說：「我唔敢拖咁耐，驚抽離唔到。」電影憑突出風格，先後入圍「第22屆西班牙亞洲夏日電影展」 競賽部份，以及第24屆紐約亞洲電影節，定於復活節4月17日上映。
《搗破法蘭克》由「拾陸比玖」製作，以眾籌方式開拍，除了4位主角，其他演員包括袁富華、楊偉倫、陳獻略、王嘉盈、近南哥及肥豪等，故事講述一群叛逆青年，組成劫富小隊，犯案留下塗鴉標記，戴上兔仔面具，自拍械劫過程，上載互聯網，挑戰道德底線，賭上自身前途及安危，但求點擊流量，同時公然狙擊奸詐黑商，引發社會軒然大波。
立即更新/下載AM730手機APP 體驗升級功能
