早霸王丨小儀重提拍拖7年前度感觸落淚 曾重遊舊地觸景傷情：唔應該為佢喊
由森美、阮小儀、梁嘉琪主持嘅香港商業電台叱咤903電台節目《早霸王》一向廣受觀眾歡迎；4日直播一集，小儀於節目中提及與拍拖7年前度，更加感觸地落淚。
53歲小儀涉足電台及電視工作，發展不俗，吸金力極強，有傳年賺過百萬，被指係圈中「黃金盛女」，佢喺節目《早霸王》「霸王我最喜愛全球華人勁爆金曲至尊歌」環節中，就主題「好大感觸」挑選咗樂隊Zen歌曲《I Remember You》，並大談拍拖7年嘅前男友，表示與前度爸爸媽媽好熟，曾經喺分開後探望佢哋，對方爸爸就向佢暗示指唔好諗住等返個前度：「佢爸爸嘅意思係，你點等呢個人都冇用，佢唔會記得，你走啦。」
「哎啊，佢喊啊！」
森美見小儀再想分享該前度嘅故事就阻止，不過小儀嘅心情就被觸動，梁嘉琪見狀勁激動：「哎啊，佢喊啊！」小儀續指唔應該為佢喊：「因為呢一個真係傷啊嘛，人生入面有幾可咁傷啊？哎啊，點解喊啊？我唔應該為佢喊。」
小儀又分享當年與前度成日相約喺銅鑼灣西武百貨，有次重遊舊地時不禁觸景傷情：「有日我揸車經過，發現西武結業，其實當時已經分開咗起碼6年，但我個心突然好痛，覺得個天連一個記得佢嘅地方都唔畀我，但係我仲嬲自己嘅係點解我仲要記得你啊，我好唔開心，喺車度喊，打畀森美嗰陣佢話『你仲掛住佢做咩？佢有腳臭㗎』。」
每次分手皆因有第三者
小儀指西武結業令佢知道一定要忘記呢個人，而森美就再安慰小儀，表示其實掛住對方冇問題：「因為你真心愛過佢，但係唔好自私，唔好要對方一定喺你身邊及一定要愛你。」
小儀曾經於ViuTV節目《吃掉前男友》亦分享與同一名前度嘅經歷，表示過去每段感情都係因為對方有第三者而分手，與拍拖7年前度亦唔例外，除咗由讀書到工作各有各忙令感情變淡，亦牽涉第三者，又透露曾經想與該前度結婚，但喺30歲時突然分手。小儀當時亦喺節目感觸地表示過去嘅人出現係有原因，去學習應該點行落去，及想向每一位前度道歉：「因為過去嘅自己做得唔好，以前會埋怨對方點解要咁樣對自己，但其實撫心自問佢點解會有第三者，其實可能係自己做得唔好，所以令對方離開。」
原文刊登於 Yahoo 娛樂圈
登革熱｜症狀、傳播途徑、避免蚊子叮咬、預防方法。（衞生署衞生防護中心FB）
amJetso 送BIODERMA救星小紅瓶🩷護膚恩物 立即按此參加👇
