返回

2022-01-24 22:41:00

泳兒相隔9年再出碟超揼本搞造型

分享：

今年首兩個樂壇頒獎禮成績突出的泳兒（Vincy）睽違九年，推出全新廣東大碟《Dark Light Of The Soul》。Vincy表示大碟的出現，完全是一個「意外」，「三年前開始暗黑系列嘅曲風，一直都冇諗過出碟，只係想製作一個同我以往完全唔同風格嘅系列曲風，但一路行落去嘅時候，外間嘅反應都幾受落，公司亦都好支持，然後就提議不如出碟，所以今次完全係意料之外。」

泳兒在新碟中以六個造型登場。

揼本造型

相隔九年再次出碟，Vincy坦言緊張又興奮，「對上一隻大碟應該係2013年，再出梗係緊張，同時今次係我出碟以嚟最興奮嘅一次，因為三年嘅結晶，亦都係暫時嚟講係我最鍾意、最代表到我嘅大碟。」大碟共收錄十一首歌，以六個造型登場，當中以紅色ruffle裙最為搶眼，裙擺的範圍大到足以覆蓋整個拍攝棚，認真誇張，「其實條紅色大裙係郁唔到，我係要行入條裙入面，着咗之後係唔可以郁，因為真係好大，大到可以收埋十個小朋友！好似一個客廳咁大！」

泳兒的紅裙擺的範圍大到足以覆蓋整個拍攝棚。

泳兒笑言似玩空中瑜珈

鼓勵低潮朋友

Vincy今年首隻推出的歌曲《葉落冰川》MV亦於今日上架，《葉落冰川》同時亦是Vincy今日推出大碟的中文名《花開溝渠葉落冰川》，「其實喺呢三年裏面，都做咗好多同泳兒以往曲風好唔一樣嘅歌，去到最終最終章，我哋會比之前嘅歌『抆』走咗少許嘅暗黑，我哋大走家一致都好希望可以凝聚到一種力量，去勉勵所有曾經可能喺溝渠、遇過低谷嘅朋友，到最終只要大家繼續行落去，行吓行吓去到冰川嘅話，都仍然可以見到希望。」

泳兒希望透過自己的作品走出低谷。

泳兒相隔9年再出碟。

入App免費換走健康產品