盧宛茵（中）與吳浣儀上楊紹鴻Youtube頻道《小鴻吹水站》（Channel Gary Yeung影片截圖）
楊紹鴻近年開設Youtube頻道，同曾經合作過的藝人訪問傾偈。前亞視製作人楊紹鴻近期找來兩名資歷深厚嘅演員盧宛茵同吳浣儀做嘉賓。一輪熱身之後，楊紹鴻入正題問二人對現今電視圈嘅睇法，人稱Madam的盧宛茵先係大笑一番，然後直言電視圈「每況愈下」，而吳浣儀認同之餘再加多句「夕陽工業」。
盧宛茵以黑面應對後輩教演戲
三人講到演員水平，楊紹鴻話而家好多劇集的角色都係冇父母，因為「冇晒甘草演員」。盧宛茵對於新一代水平未夠有他的看法，Madam話「以前都有戲劇大師，即係阿King（鍾景輝）教我哋呀嘛，都獲益良多。但而家唔係，『好聲音』唱吓歌又話『得喇，出嚟拍啦』，賣吓廣告又話拍啦！」，吳浣儀就認為好多後輩基本功唔夠。
講到興起，盧宛茵直指有後輩「樣樣唔識一舊雲，仲要教人喎」，隨即自爆開工時被後輩「指點」，「試過叫我呀……『你呢句對白應該咁講喎』」，當時Madam聽到「吓」一聲再望吓對方，無理到「意見」，「咪照我自己做囉，使乜理佢？」。咁後輩請教前輩呢？盧宛茵同吳浣儀都話好少，但效力亞視多年嘅吳浣儀話試過指點下，對方都接受，盧宛茵聞言立即唔同意，仲話「唔好呀，黑面㗎！」，而楊紹鴻打圓場表示「可能唔同電視台啦」。
楊紹鴻嘆經理人硬捧藝人 搞亂影視圈
曾經於內地工作嘅楊紹鴻，自言多年前已經認為部份經理人公司硬捧旗下藝人，搞亂整個影視圈，對行業造成影響。「將演員當成賺錢工具，未紅已經捧到佢哋變天王巨星」，楊紹鴻提到有年輕藝人身邊有多名工作人員服侍時，吳浣儀都見過類似場面。盧宛茵憶述八十年代拍長劇集《季節》，碧姐（鄧碧雲）都係一個人開工，對於而家情況嗤之以鼻，認為此風不可長。「睇到啲人出外景我都作嘔呀，一個拎遮、一個拎茶、一個撥扇，嘩！大佬而家咩事呀？」，吳浣儀亦和應「發哥周潤發都唔會有啦！」。
講完年青藝人，三位前輩都提到電視台管理層睇錢份上，盧宛茵試過於某場合同一名電視台高層碰面，Madam談到對電視台某劇集意見時，該名高層一頭霧水，估計對方唔清楚劇集製作情況。
原文刊登於 Yahoo 娛樂圈
amJetso 送BIODERMA救星小紅瓶🩷護膚恩物 立即按此參加👇
