叻哥表示將會告別幕前。
陳百祥(叻哥)今日為節目《答得快 好世界》錄影，他表示今次是以《全港智叻星》嘉賓主持身份亮相。他指《運財智叻星》是向日本購入版權，如今是全新節目，所以需要改名。他又表明，今次是他最後一次擔任電視節目主持，日後不會再參與主持、電影及電視工作，坦言將要另覓人生目標。
72歲搵人生新目標
叻哥自言跟譚詠麟同年，現年72歲的他認為今次拍攝遊戲節目是一個很完美的回憶︰「《運財智叻星》喺95、96年推出，當年最高40幾點，平均30幾點，我話過要有人做到呢個收視，我先出嚟，點知等廿幾年都冇人破到紀錄。」他又提到因為《運財智叻星》的出現，才有曾志偉的《獎門人》系列，感覺像傳位予對方。他說︰「《運財智叻星》係我一生最有滿足感嘅節目，今次拍返節目係一個好嘅終結。電視平台我之後都唔再做，電影都唔會拍，當然可以做嘉賓。我都72歲，要創業，要搵另外一個目標。」
叻哥、肥媽及彭健新等為節目《答得快 好世界》錄影。
叻哥笑稱要救樂壇
問到未來目標，叻哥說︰「我搵緊，係一生人未做過，依家未知，但我覺得我會搵到。」至於是否會開老人院，他笑說︰「有可能！石天當年都係退休之後開，如果普通人都做到，唔啱我做。(做嘉賓呢？)唔知呀，依家都冇人搵我做嘉賓啦！(息影？)係告一段落，我唔敢講之後嘅工作係咪唱歌，我諗住去救個樂壇，哈哈！」他表示自己不是靠唱歌、跳舞搵食，是靠食腦，他又否認自己跳舞叻過郭富城︰「係人哋話我叻過郭富城，我連佢十分一都冇！」
🎁 amJetso請你睇《焚城》，快Ｄ開APP玩👇 👇
