朱敏瀚與賴慰玲一齊宣傳新戲《奔跑吧！勇敢的女人們》。
蕭正楠、吳若希、朱敏瀚及賴慰玲等今日到馬鞍山出席新戲《奔跑吧！勇敢的女人們》。賴慰玲挺住巨肚帶埋囝囝出席活動，但她依然手腳纖幼，行動自如，朱敏瀚在她上落時傍實，非常有紳士風度。
賴慰玲在劇中扮演一個明星，獲很多觀眾寵愛，但就沒有愛人寵愛。朱敏瀚指其角色是扮演蕭正楠的經理人，並為對方打造一個愛妻號的人設，但沒想到對方背後的關係很混亂。問到劇中是否反映娛樂圈一些現象，賴慰玲說︰「我認識嘅娛樂圈係好簡單，好清潔，無咁複雜……(偷笑)所以今次咁複雜真係好難演！哈哈！」朱敏瀚續說︰「你演番係super star就唔難演啦！」賴慰玲就表示這方面當然不難。
朱敏瀚稱他的角色參照了自己的經理人，由於他的經理人亦在場，朱仔不忘大聲表示︰「我個角色係參照自己經理人㗎！佢真係對我好好！係戲入面好嘅嘢都係抄襲佢！(咁佢又幫你搞人設？)入面唔好嘅係純料演技！」
賴慰玲表示隨時生得，已經要帶定走佬袋去開工。(娛樂組攝)
朱敏瀚賴慰玲少對手戲感遺憾
他們表示此片在年頭拍攝，大家的樣子也沒有點變，賴慰玲笑謂只是自己的身形有變，「有時啲劇拍完要兩、三年之後先播，依家就一年內播，真係好好！(拍嘅時候有咗？)唔係，係拍完晒之後。」她表示BB已經足月，很快出世，笑謂要帶走佬袋去工作，但BB幾時出世要看其造化。
朱敏瀚透露今個聖誕節約了好友一齊過，及準備不同的宣傳工作，下星期會到馬來西亞宣傳。賴慰玲稱之後的宣傳會改在網上進行，坦言要人照顧也不方便。他們表示今次在劇中的對手戲並不多，朱敏瀚跟蕭正楠最多對手戲，他坦言收到劇本時見到有賴慰玲感到非常開心，「因為之前有個機會係演姊弟，但冇咗，然後到今次係同一套戲，好開心啦！點知又唔同場口，但係就好記得去佢屋企大家一齊對戲，覺得佢屋企好舒服！」
朱敏瀚表示自己有不少存貨，今次劇集可以年頭拍完年尾播，大讚非常好。
公司已問幾時復工
賴慰玲表示坐完月之後才再接工作，而手頭上仍有少量劇集存貨。她指公司有問她何時可以復工，「有問我坐月要坐幾耐？我話一個月啦，之後就問我可唔可以坐完就開工，我話咁急！其實都唔介意嘅，因為拍劇我都係鍾意工作，坐完月就到時間就ok，我係最驚就唔到餵人奶時間，如果就到就可以開工！」談到要湊兩個仔，賴慰玲表示不太擔心太吃力，因為大仔已經非常懂事。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
