![](https://cdn.am730.com.hk/s3fs-public/styles/article_image/public/2023-03/WhatsApp%20Image%202023-03-07%20at%2011.12.25%20AM%20%281%29.jpeg?itok=u9-MegMP)
鄭秀文(Sammi)日前現身YouTube頻道「Pomato 小薯茄」,為《雪櫃冷笑話》環節擔任嘉賓,驚喜玩自嘲,被指其題目及答案係歷來最爆,網民一致讚好,仲問點解可以咁高質。鄭秀文昨日(5日)再接再厲,於IG分享與電影《流水落花》導演賈勝楓拍攝嘅「微波爐冷笑話」,惹嚟網民留言指好搞笑。
鄭秀文早前於小薯茄《雪櫃冷笑話》中自嘲身材出題:「鄭秀文跑步,估一個男藝人嘅名」,一眾主持忍笑又唔敢回答,直至鄭秀文扮跑步動作開估︰「吳鎮宇(唔震乳)」,逗得一班主持哈哈大笑,直言唔敢畀分。短片推出至今4日,已獲2.8萬個讚好。鄭秀文昨日就分享自己與《流水落花》導演賈勝楓版本嘅冷笑話,指佢哋正值《流水落花》謝票埸等候室拍攝。
![](https://cdn.am730.com.hk/s3fs-public/styles/article_image/public/2023-03/WhatsApp%20Image%202023-03-07%20at%2011.12.25%20AM.jpeg?itok=i_s47AHE)
網民表示好搞笑
鄭秀文今次嘅冷笑話再次自嘲身材出題:「鄭秀文籍貫?」,賈導演直言好難答,詢問鄭秀文會唔會有貼士,不過好快佢就估係緬甸或越南,一路都忍唔住笑嘅鄭秀文就開估:「係寧波人(零波人),笑到賈導演拍晒手掌。鄭秀文就話呢次冷笑話來源係嚟自於小薯茄嘅網友留言,特別鳴謝雪櫃冷笑話嘅創作者,仲寫道:「天生我才(我嘅身材)必有用」。唔少網民都留言表示好好笑:「多謝妳俾我帶來開心呀」、「喂啊,天后俾返少少儀態得唔得」、「妳可以同子華開棟篤笑舞台劇」、「睇黎係時候要拍返部笑片」等等,韓流達人伍麒匡仲留言指:「開完演唱會可考慮開talk show」。
原文刊登於 Yahoo 娛樂圈