2022-09-21 16:24:17

金球獎醜聞不斷被割席明年電視台終於肯直播

接近年尾，唔少電影媒體都開始做緊頒獎禮前瞻。其實「頒獎禮」嘅「前瞻」都可以係新聞，今年初近乎無聲無息舉行咗嘅金球獎，最新消息係直播盛事多年嘅電視台NBC，同金球獎主辦單位荷里活外國記者協會(HFPA)簽訂播放協議……一年咁多。

搞到咁風雨飄搖，皆因HFPA爆出多項醜聞，包括涉嫌歧視黑人、性騷擾同賄賂，又被揭發87名非美籍記者會員當中，一個黑人都冇。唔少藝人因此跳船割席，Tom Cruise索性連獎座都交返出來，而Amazon、Netflix、華納都表明唔再同金球合作，本身簽咗多年直播合約嘅NBC更加取消直播，令頒獎禮只係以私人活動形式舉行，並喺大會官網即時公布結果，靜過太空。