MIRROR「夜粥組」AK、Lokman、Alton和Frankie出席除夕倒數活動，並接受訪問。(娛樂組攝)
MIRROR成員楊樂文(Lokman)、江爆生AK 、王智德(Alton)，陳瑞輝(Frankie)、雲浩影(Cloud)和《造星5》的Snoopy詹仕偉於昨晚大除夕現身沙田表演，及倒數迎接2025年，fans早早迫爆商場，MIRROR四子各自演唱個人單曲《如果電話亭》、《信之卷》、《道路使用者的有型守則》和《皮思苦》，並走到台下與觀眾近距離接觸，又即興與fans互動對話，全場high爆，「夜粥小組」在倒數前首次跳唱《FING!》，將氣氛推至高點。
正能量帶來好運
四子各人大談新年願望，Lokman和Frankie都希望身體健康，能繼續做自己想做的事，順順利利開開心心；AK就希望全年好運，最理想是抽到心頭好的卡牌，若能《12怪盜》中Frankie的角色，被好運包圍，就事半功倍，他補充說：「多做善事，保持正能量，自然就好運，所以希望大家長期保持正能量。」；Alton去年嘗試了第一次演舞台劇、出solo歌，「祝大家2025年都有好多個第一次，第一次搵到鍾意嘅事，第一次搵到好多錢，第一次乜都好。」談到今年有甚麼想達成的第一次，他就認為抱從容態度，會更感驚喜地迎接第一次。
有進步空間才有下一次
AK在活動上自薦主持動物和烹飪綜藝節目，他笑言只是隨心想，十畫未有一撇；Frankie預告今年有兩部劇集，其中《麻甩媽咪》預計年初推出，並暗示會主唱劇集歌曲，Alton就表示年中有劇集推出，Lokman透露據聞《存酒人》將於年中推出，至於下一首solo則未有定案。「夜粥小隊」昨晚首次公開跳唱小組歌《FING！》，AK即表示：「可圈可點，so far so good，合格嘅。」Lokman笑言：「不過不失，當然第一次表演，都寄望有進步空間，如果第一次100分就唔得掂，根本冇可能，亦都希望今次未係好高分，希望會再有下一次表演俾大家睇。」
Dance version獲好評
談到剛推出的dance version《FING！》，由於一take過拍攝，Lokman大爆四子和一眾舞者都非常緊張，幸好愈跳愈從容。今次運鏡拍攝獲fans激讚，被問到可會延伸至MIRROR團歌，AK回應道：「我覺得focus自己，因這計劃是我們4個人，可以掌控的事情比較多，可以參與的部分也比較多，其他就要集合大家意見。」至於「夜粥小組」今年會否再接再勵推出小組新歌，他們就呼籲大家公開爭取。至於MIRROR在新一年會否再有新組合或嘗試，Lokman直言已有不同計劃，但仍未能透露詳情，「嚟緊我哋個人、小組或者團體都有一啲計劃嘅，大家想知道就要留意多啲我哋啦！」Alton補充說，「如果想睇不同項目，不是單純我們自己想就可以，要靠大家都支持，反應好的話，相信大家會越來越多機會。」AK續說，「可以用不同方法讓身邊的同事知道，例如留言、吶喊，我們的公司地址大家都知，就算靜坐都接受。」Lokman指最簡單方法是口耳相傳，在社交平台廣傳，AK笑言，「約定大家，2026年我最喜愛歌曲。」
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
