Ian新作《擁抱後的歌》談長大後的自己想跟過去的自己說甚麼。
由陳卓賢（Ian）作曲的《擁抱後的歌》找來周耀輝填詞，新歌MV原定於晚上9時播出，但最後延至晚上9點半才正式公開。提到今次創作，Ian表示今次歌曲靈感源自一次閱讀後感，他說：「寫呢首歌嘅時候，我睇緊一本書，係講寫一封信俾童年嘅自己，當時我諗，如果見到童年嘅自己會講啲咩呢？諗咗一輪，發現原來係冇咩可以同佢講，亦都唔會特別同佢講啲乜嘢，最多只係送上一個擁抱，所以就有《擁抱後的歌》嘅誕生。」
Ian今次新歌不論拍MV或錄音時都用最簡單直接的方法去處理。
一段關係見證的曲
《擁抱後的歌》談的是人生到了某個階段、某個年紀，再遇童年自己時的忠告，但同時亦是童年的自己審視現在的我時的叮嚀。他以自己為例去解說：「以前做運動員，日日流緊汗，又或者每日工作都有血有汗，獻上嘅擁抱，代表我知道你嘅有血有汗，但唔緊要，係合理㗎！因為呢啲代表成長印記。」
歌詞中的首句「原來天天有汗 原來天天大個」就已一語道破當中的辛酸與理解。這首歌亦是送給Inner Me（內在的我）的一首歌，Ian說：「日常生活中我哋未必察覺到佢，可能因為好少時間同自己傾偈，但自己同自己對話嘅時候，就會發現喺心裡面其實住咗另一個自己。」歌曲看似是Ian很Personal的一首歌，但從另一角度去看，歌曲亦談及人與人之間的關係，Ian分享道：「不論同朋友又好，親人又好，相信呢個世界每一種關係，就算幾親密都好，都有散席嘅一日，所以呢首歌，都可以作為一段關係告終同離別嘅見證。」
Ian希望今年可以推出6首歌。
簡單直接表達情感
這次Ian不論在拍MV或錄音時都用最簡單直接的方法去處理，Ian道：「MV唔會好似以前咁要拍攝好長時間，要分shot令到件事畫面好豐富，簡單直接就可以。錄音亦都係，以往錄音都係錄兩個Session，今次只係錄咗個幾鐘，用咗一個好冇修飾、最直接、最instant嘅方式，呈現出由心而發嘅感情，呢個係最想俾大家聽到。」
目標出6首歌
回顧2023年過去7個月，Ian已推出了3首作品，但Ian似乎未夠喉，他說：「其實想出愈多愈好，我嘅目標之前想出5首，但而家想嘗試下會唔會可以出到6首，其實今日拍MV嘅時候，我嘅下一首歌已經進入準備灌錄嘅階段，想早啲錄定，早啲拍MV，然後可以早啲俾大家聽到。剩返幾個月就到2024年，希望出到心目中預期嘅5至6首歌！」
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
