陳慧嫻40周年演唱會第三場請來好友李克勤任嘉賓。
陳慧嫻40周年演唱會來到第三場，邀請了昔日寶麗金同門好友李克勤任嘉賓，慧嫻台上跳到甩褲，叫克勤幫忙，又吩咐克勤唔好咁辛苦為兒子賺錢！
慧嫻休息一日之後，昨晚重返紅館，依舊狀態大勇，氣氛比前兩晚更熱烈，整晚都全場大合唱歌聲震館，令她十分開心，不知是否觀眾反應熱烈，慧嫻亦被帶動忘我，跳舞環節興奮跳到甩褲，當她與克勤完成《跳舞街》之後，立即大叫：「克勤呀！我唔知係咪瘦咗呀，我條褲甩左落嚟，我入面條打底褲呀……你幫我搞搞得唔得……」李克勤就尷尷尬尬笑住話：「我有家室㗎喇喎……」慧嫻說：「唔緊要啦，當睇唔到啦今晚……」克勤：「搵個女dancer過嚟啦，過年流流……」引得觀眾大笑。
兩個由20歲就相識的好朋友，從寶麗金年代已經同一間唱片公司，兜兜轉轉又再於新公司英皇娛樂中做回同事，慧嫻表示：「佢係李克勤！佢值得啟德個館咁大掌聲呀！」克勤笑道：「咁客氣呀，識咗幾十年……」慧嫻就答：「 就係識咗幾十年，我哋好少喺台講真心話，通常真心話都係我哋係電話講，佢真係一個天才嚟㗎！我做咩都問佢意見，今次演唱會佢都特登第一場就嚟睇，又俾咗好多意見我，好多我諗唔到嘅嘢，佢都諗到。咁多年，我做咩節目，接咩工作，佢都俾好多意見我，我乜都問佢，不過近半年我見你不停咁巡迴演出，飛去呢度飛去個度，我都唔敢打咁多電話俾你，有時見到都覺得有啲心痛，做咩咁辛苦啊？」克勤回話：「嘩，我有少少眼泛淚光添，我家庭負擔重嘛。」慧嫻即訓話：「你唔好咁辛苦！等佢哋好似你咁白手興家！自己賺錢！」觀眾即掌聲雷動，克勤笑道：「我都要使㗎，男人需要安全感嘛，我咪努力搵錢囉。」慧嫻：「係啦，你仲係一個細路，你仲要砌嗰啲咩go嘛。第日我冇得食，唔該你救濟下我啦，as my best friend ，我知你一定會，我依家落去換衫，你同我唱半個鐘啦。」
克勤獨唱時謂自己為了這個好朋友，第一晚刻意就來捧場：「我都未試過做人嘉賓要跳舞嘅，誠意十足㗎啦，睇咗一次先，有定心理準備。今晚揀咗一首慧嫻冇喺演唱會揀嘅歌俾大家，如果大家鍾意，一陣熱烈啲一齊唱。」接著唱出慧嫻的經典名曲《去吧》，行走CD果然名不虛傳，令觀眾聽出耳油。
入App免費拎23大商場蛇年利是封
