2025-01-17 15:38:59

陳柏宇為宣傳演唱會現身銅鑼灣「舉牌」網民：見到個畫面有啲心酸

陳柏宇 (Jason) 早前宣布將於2月15日及16日假會展舉行兩場《「LIFE IS LIVE」演唱會 2025》，票價分為 HKD 999 / 799 / 599 。陳柏宇相隔兩年再於香港開騷，可是有傳門票銷情一般，日前，更有網民拍到陳柏宇親自在電車站為演唱會落力宣傳。

有網民在社交網分享一張照片，相中見一名全身黑衫打扮的男子坐在銅鑼灣電車站一石壆，並拎住一塊牌，牌上以綠底黃字寫上「陳柏宇開騷啦」，睇真啲，原來真係陳柏宇本人。該網民寫道：「琴日經過銅鑼灣，見到有個男人拎住個牌，以為fans拎住牌幫手宣傳，睇真啲發現真係陳柏宇嚟！！同啲大媽融入咗，差d仲以為隔離係佢個女」不少網民都留言表示：「雖然陳伯一向貼地玩得，但見到個畫面有啲心酸」、「佢真係冇觀眾緣」。