《風再起時》舉行首映，一眾演員現身星光熠熠。(林俊源攝)
由兩大影帝梁朝偉和郭富城主演的香港史詩式電影《風再起時》昨晚（7日）舉行首映，導演翁子光及一眾演員包括：何珮瑜、謝君豪、吳卓羲、金燕玲及張可頤等亦有出席。
電影中飾演梁朝偉太太的何珮瑜（Jeana）表示，首次跟影帝兼男神偉仔合作十分緊張，坦言被他的電眼迷倒，「第一次合作，我稱呼佢做梁生，梁生就好幽默咁話『你嗌我Tony都得㗎喇。』我就話『Tony？係嘅，Tony哥。』自此拍戲期間我都係叫佢做Tony哥。第一次見面就俾佢對電眼電到，望住佢對眼我呆咗幾秒，實在係太有魅力啦！」
何珮瑜與梁朝偉在《風再起時》演夫妻。
梁朝偉真人好幽默
Jeana大讚梁朝偉是一個很好的前輩，十分關心後輩，而且非常幽默，「記得嗰陣時我啱啱智慧齒發炎，要喺拍攝當地睇牙醫，最後剝咗兩隻智慧齒，Tony哥知道，每一日開工佢都會問我『點呀，你隻牙好番啲未呀？』我話『好番啲啦。』好搞笑，佢好關心後輩啲牙㗎，哈哈。同埋因為佢知道我哋緊張，所以佢成日都會講吓笑，好幽默咁講，可能節奏比較慢，你係feel到佢係想緩和個緊張氣氛。」
何珮瑜集齊三大影帝合照。
同偉仔拍咀戲好緊張
除此之外，電影中二人有激吻戲份，「我最多對手戲就係同Tony哥，因為我係飾演佢太太。其中有一場kiss戲，我真係好緊張，事前已經買定烏籠茶、買埋牙刷清潔口腔，我諗呢場係我咁耐以嚟最緊張嘅kiss戲，都NG咗三、四次，哈哈。」電影背景設定在上世紀中葉的香港，Jeana飾演的「南江太太」，服裝造型也非常具有上世紀的懷舊韻味，尤其是在與梁朝偉飾演的「南江」探長結婚場景中，她所穿的婚紗非常復古精美，讓人眼前一亮。
和記行集團70周年聖誕送7大厚禮🎁 冷氣機 |風扇 |車用揚聲器 立即帶返屋企👉
