16位佳麗在炎熱天氣下進行拍攝。
《2023香港小姐競選》16位佳麗，日前在嘉賓主持黎諾懿及兩位師姐謝嘉怡及梁凱晴帶領下，前往越南峴港及會安拍攝外景。
第二日外景拍攝，16位佳麗身穿仙氣白裙，前往被列為世界文化遺產的美山聖地拍攝MV。經過連日來密集式訓練，16位佳麗除了擺甫及跳舞愈見有板有眼，無論鏡頭背後多熱多累，只要一見到鏡頭即能九秒九綻放甜美笑容；而經過連日來「朝見口、晚見面」，佳麗間感情明顯升溫，不用埋位時眾人Keep住雞啄唔斷兼有講有笑。
8號姜依宁壓力大爆喊。
感覺較為害羞的8號姜依宁，與13號陳曉彤及15號莊子璇接受訪問時，被踢爆前一晚排舞時因壓力大爆喊，對此姜依宁解釋：「我覺得自己做得唔夠好，笑容唔夠，要更加努力。」並感謝身旁兩位好友及戰友全程陪伴及打氣，才令自己馬上破涕為笑。三人又指現在已變成「笑容專員」，無論是大會鏡頭或工作人員手機，只要一對著自己便能擠出燦爛笑容。
經過連日來密集式訓練，佳麗擺甫士及跳舞愈見有板有眼。
佳麗又互爆趣事，結果以莊子璇的「過時面膜」及4號王怡然的「周身冇蚊」事件最有娛樂性。莊子璇說：「尋晚我哋大概一點零瞓，但瞓前點都要敷個mask；我敷住咁去咗第二位佳麗間房，點知冇為意瞓著咗！個零鐘後醒番塊面膜已經乾晒，咁樣反而弄巧反拙。」王怡然說：「我同Zora（14號陳怡名）三個人去買嘢，大家都以為大家身上有錢，咁買咗好多零食，點知到畀錢嗰陣，先知原來大家都冇帶錢。（咁最後冇買到零食？）有呀，咪返番酒店攞錢先再買。」
16位佳麗身穿仙氣白裙，前往被列為世界文化遺產的美山聖地拍攝MV。
立即更新/下載AM730手機APP 體驗升級功能
