(林俊源攝)
【專訪】林以諾牧師十多年前首次以棟篤笑形式舉辦佈道會，為向來嚴肅的傳道模式注入新風格，雖然有人不滿其作風高調，亦有人不滿他把耶穌稱為「穌哥」，卻無阻福音信息傳播至世界各地。他早前因健康理由提早退休，多個籌備中的大型佈道會，需因此而「急煞車」。
由於患上失眠及驚恐症，林牧師早前決定提早退休。他透露，教會曾建議他休息一年始復職，又或轉任顧問，但他認為這樣仍有一定壓力，「我依家唔係跌傷隻腳，跌傷隻腳我知9個月一定好，心理壓力我就覺得……諗起一年後都係壓力嚟，愈接近deadline(死線)，你愈係壓力嚟。咁我話唔好喇，就申請提早退休。」
林牧師回想，過往工作排得密麻麻，難覓喘息空間，「每個appointment(約見)你都唔可以甩」，每年更要準備多個大型佈道會。他舉例曾到澳洲出差，乘夜機出發，抵達後即出席活動、會議及聚會，翌日再乘早機回港，仍需繼續工作至深夜，「以前聽慢活，我覺得嘥氣，咩叫慢活，我哋快快手手做完啲嘢去，一樣接一樣，原來係壓力嚟，真係壓力嚟。我十幾年嚟呢個壓力，個tension(張力)拉得好緊。」
由於這次是「無計劃」的退休，手頭上多項工作須「急煞車」，包括原定於澳洲舉行的大型佈道會，以及每年一度的「Yeah Show」棟篤笑音樂佈道會。他透露已訂好佈道會主題，並準備相關海報，無奈要全部停止。記者問主題是甚麼？「呀好嘢呀，《你都有今日》。」
好友屢邀「復出」
林牧師於今年2月開始休假，至5月正式退休，這陣子身體狀況有改善，睡眠質素亦有好轉，其間不少朋友遊說他「復出」，包括定期講道及教書等，均被他一一婉拒。他直言希望休息一段時間，再評估自己的情況，日後或只會擔任一些簡單工作，例如客串講道，「你話有一個commitment(承諾)，負責10堂嘅，即係10個禮拜，咁我就唔會做。」
回想逾30年的工作生涯，牧師一職令林以諾有機會接觸社會不同階層、祝福他們，但籌辦佈道會，特別是棟篤笑音樂佈道會的工作並不容易，更令他少了時間陪伴家人，但整體來說仍是「得多於失」。林牧師笑言現時「專心退休」，包括定期行山、學習烹飪及出席朋友聚會；本月前赴英國出席女兒的畢業禮，9月則到澳洲旅遊。
不再發表敏感言論
林以諾過去曾就政治及社會議題發言，最富爭議當屬反對「佔中」及同性戀，除登上「C1」(娛樂頭版)外，更被網民冠以「反佔中」及「保皇黨」之名。此刻的他卻有這番感受，「我覺得做牧師係應該，你能夠接觸每一個唔同嘅人，關心每一個唔同嘅人，只要佢係人，我嘅態度係咁嘅。佢同你性取向唔一樣，佢同你政見唔一樣，佢肯俾你關心，肯同你交個朋友，我覺得我都會做。」
但他坦言，退休後「不在其位」，不會再發表敏感言論，「我將來就算喺Facebook分享嘢呢，我都唔會分享政見呀、性取向呀，我都唔會分享，因為我覺得你都唔喺呢個位置喇，你講乜呢，你不如站番喺退休人士身份，講番退休嘢。」
陳振聰獄中積極樂觀
書信交流支持信仰
華懋集團「千億爭產」案，商人陳振聰因偽造及使用虛假遺囑罪入獄12年。陳振聰當年由「風水師」變為虔誠基督徒，便是在林以諾牧師的教會受浸。林以諾透露，9個月前曾探望陳振聰，當時他精神不俗，態度積極樂觀；雙方每隔1、2個月有書信交流，主要談及信仰話題，「都係鼓勵佢信仰，入面無(特別)嘢發生，唔好想像係《監獄風雲》，好平淡嘅嗰邊生活。」他續稱，原計劃上月探望陳振聰，但因對方正修讀遙距課程，碰巧需要考試，唯有另覓日子探望，「安排探佢嘅時間比較困難‥‥‥因為佢啲仔女返咗嚟香港，即係你個quota(名額)……我哋無個許可證，要用家人探訪時間，我盡量唔好佔咗人哋仔女時間。」
他回想雙方第一次見面，「起初我好抗拒，我同我太太講，我驚我見到佢打佢，『香港賤男』喎。」惟見面後印象大不同，「同(電視)畫面完全唔同，係一個真誠嘅人。」尚餘數年鐵窗生涯，作為牧師可以做的，或許是透過經文支持對方，「我覺得人嘅說話好有限，神嘅說話先幫到人。」
amJetso請食南記堂食一人牛乳火鍋 立即按此參加👇
