[專訪]特首林鄭月娥上場一年半，社會整體氣氛明顯較「振英五年」和諧，自由黨榮譽主席田北俊盛讚林鄭月娥較梁振英做得好，但若撇除比較角度，他則形容林鄭月娥是防守型特首，只守不攻，對23條立法及重啟政改等爭議議題紋風不動，直言「根本係卸梗！」記者：鄭秀韻、香詠倫 攝影：林俊源
去年特首選舉並無支持林鄭月娥、並自認是「頭號薯粉」的田北俊，早前接受本報專訪評論林鄭月娥上任至今的表現，他先「褒」後「貶」，明言若與上屆特首比較，「我梗係會讚林鄭做得好啦，至少社會分化、立法會分化係降低咗……目前市民、泛民睇法，佢純粹和諧好多……我覺得佢比上屆，即梁振英做特首嗰時社會和諧好多，所以佢民望亦高好多。」
話鋒一轉，田北俊撇開比較角度，對林鄭月娥的表現明顯有保留，「佢係咪做得好好呢？擺到明梗係唔係啦，如果係，房屋問題就唔會搞成咁，有好多嘢佢都唔處理。」他形容林鄭月娥是防守型特首，「乜都守住」。他舉例，「你問佢23條，佢話要適應時候(適當時候)、要度下時候(審時度勢)，根本就係卸梗。」另一例子是政改，「831(政改方案)否決已年幾，唔通2020年立法會選舉原地不動，同2016年(選舉)咁選落去？」
田北俊說，政改若要行前一步，需重啟五步曲，「你第一步曲都消息全冇，咁你係咪政改又唔郁？23條又唔郁？爭議性嗰啲全部唔提，日日淨係講依家發生嘅事？」早前港鐵沙中綫醜聞鬧至滿城風雨，他調侃說，「日日幫佢喺度卸梗壓力嘅就係港鐵，可以卸晒去港鐵不力，唔係政府做唔到嘢囉。」
2003年田北俊因「倒戈」不支持23條草案，令23條立法束之高閣15年，他直言始料不及，「估唔到一擺就擱置十幾年」。近年「港獨」思潮冒起，政府取締香港民族黨，加上鷹派施壓催迫立法，日後重推23條或出現加辣版，田北俊不諱言，「我都擔心呢樣！」他說，「今時今日攞返當年版本，可能中央唔接受，但如果加咁多嘢入去，相信社會討論更難搞……」
現推03年23條版本 「可以過到」
他並指若23條「七宗罪」(涉及叛國及分裂國家等罪行)一次過立法，而不是先易後難方式，相信會難很多。他明言不認同林鄭月娥指要等待適合時機推動23條立法的說法，「應該講法係攞咩出來，你攞一個當年23條版本，先易後難，我認為今日根本就係時機。」他形容現時相對03年時天下太平，「乜嘢都好掂」，若只管等候時機，「永遠唔會有好啲嘅時勢，因為每過幾年，法例再收緊啲嘅話，市民更加唔接受。」他認為，「如果過一個容易過嘅版本，絕對可以攞返03年剝咗所謂『大牙』嘅版本，我覺得今日可以過到嘅。」
建制派會接受溫和版23條？他戲謔：「邊度輪到建制派話事？」他說，「建制派收到指示，中央支持特首依法施政，特首話乜你就做乜，其實即係北京話乜，特首做乜，建制派議員就舉手贊成啦。」故他認為，「絕對唔需要擔心建制派會反對，北京支持啲嘢，建制派絕對唔夠膽反對。」
【限時激減】800 amFUN 2盒！1200 amFUN 4盒！
