葉劉淑儀(右)將會成為陳志雲(左)新節目嘅首集嘉賓。(葉劉淑儀FB)
商業電台長壽論政節目《光明頂》禮拜五之後會停播，同一時段會由商台首席智囊陳志雲同前立法會議員江玉歡各自主持嘅新節目《又係時候同一天講再見》代替。行政會議召集人、前立法會議員葉劉淑儀透露，佢將會係新節目嘅第一位嘉賓，話今年係佢服務香港嘅第51年，以接受志雲大師訪問做起點係歡快嘅開始。
同陳志雲冇「講再見」一拍即合
葉太喺社交平台話，最近已經完成咗《又係時候同一天講再見》錄影，好高興成為第一集嘉賓。佢提到「講再見」真係唔容易，話最近好多人以為陳志雲將會離開商台、問佢係咪退休，形容同自己宣布唔連任立法會議員後嘅情形差唔多，當時亦有好多人問佢係咪退休喇、會好懷念佢等等。
唔連任立法會議員嘅葉太強調，自己唔係退出公共服務，亦唔係離開各位市民，所以同陳志雲其實冇「講再見」，亦唔係退休之人，雙方一拍即合。葉太最後不忘呼籲大家，下個禮拜一夜晚11點記得收聽《又係時候同一天講再見》。
ADVERTISEMENT
立即更新 /下載AM730手機APP 體驗升級功能
