新民黨區議員劉聖雪（前排左二）榮升人母，呼籲大家齊為生育率貢獻（陳芷晴攝）
新年伊始，新民黨「小花」、東區區議員劉聖雪同大家公布好消息，原來佢上年榮升人母，仲呼籲大家一齊為香港生育率貢獻。
希望有更多母乳餵哺設施
新民黨今日舉行區議員新春傳媒茶敍，劉聖雪分享新年願望嗰陣提到，希望新一年繼續馬不停蹄服務地區，亦希望香港生育率馬上上升。佢透露自己為 生育率貢獻咗少少，上年生咗愛女，而家8個月大。劉聖雪希望社區有更多完善嘅母乳餵哺設施，佢坦言一開頭係選擇餵母乳，但喺屋企以外冇足夠嘅設施，令到佢卻步，而家都轉咗餵奶粉。
灣仔區議員孫道弘提到4年一度嘅灣仔節今年7月至到出年3月舉行，會結合區內特有嘅景點、建築等舉行活動，希望令全港以至海外旅客感受灣仔嘅活力。講到吸引旅客，沙田區議員廖子聰話今年會同鄉議局合作搞好「北都馬拉松」，鼓勵市民去沙田，再去北部都會區遊覽。而西貢區議員陳志豪就提議政府喺熱門生態遊景點實施收費，佢強調目的唔係賺錢，而係透過措施控制人流，兼且可以用收入改善設施，提升遊客體驗。
ADVERTISEMENT
請你去迪士尼樂園玩！登記攞飛！
