23條立法｜鄧炳強解答街市改衫檔販疑慮 指立法後「改衫都改得靚啲」｜Ray Online
政府已經完成基本法23條立法。保安局局長鄧炳強去到九龍城街市解說法例，佢向改衫檔販澄清喺立法之後，絕對仲可以批評政府。佢又話立法對香港有更加強嘅保護力，市民可以更開心咁生活。
曾經係九龍城街坊嘅鄧炳強，去到九龍城街市拍電視台節目。改衫檔販Eva話支持立法，「起碼唔使驚人亂嚟，鍾意乜就乜」。不過，佢話23條立法之後，真係唔夠膽批評，話以前可以高談闊論，鬧下呢個、鬧下嗰個。立法之後就講嘢都有啲保留，擔心隔牆有耳。
澄清絕對可以批評政府
鄧炳強即刻澄清，話「其實Eva姐，你唔使擔心」，就算有23條都絕對可以批評政府。佢強調政府好鍾意聽市民嘅意見，市民反映做得唔好嘅地方，政府可以吸取意見做得好啲，最重要聽到市民嘅聲音。
鄧炳強回顧2019年反修例事件，正正就係因為當時冇足夠嘅法律工具，令好多年輕人被煽動。而23條立法之後，市民可以更加開心生活，「做生意，你改衫都改得靚啲」。
amJetso送太興鮮臘腸 👇立即按此參加
